– Dette burde vore unødvendig

– Eg har varsla politiet om mykje stygg kjøring på Byvegen desse dagane, av lastebilar og vogntog med jordmasser frå Bybane-bygginga, som kjører svært fort og ofte tett oppi kvarandre, seier ein innringar til Midtsiden.no.

Men det er ikkje det han oppfattar som grisekjøring innringaren, som sjølv er lastebilsjåfør, reagerer mest på.

– Det er heilt ufatteleg at jord- og steinmasser frå byggearbeid langs Fleslandsveien skal kjørast heilt til Os for deponering. Problemet er at Bergen kommune ikkje har kapasitet nok, og det er ei skam.

– Etter det eg kjenner til er det rundt 25 lastebilar som kjører i to skift, frå 7 om morgonen til 23 om kvelden, for å dumpa jord i Os. På Byvegen, som har så mykje trafikk frå før.

– Eit tankekors

Det er Drange Maskin AS som vann anbodsrunden for første av fem delar av Bybanen frå Lagunen til Flesland.

– Det var eit stort og kjekt oppdrag å få. Vi har tilsett nye og fått inn vikarar, samtidig som vi har med oss Vestafjell på oppdraget, seier dagleg leiar Rune Grimstad.

Rundt 600.000 kubikk med masser skal flyttast på. Noko blir brukt under bygginga og i nærområdet, men cirka halvparten skal til Os.

– At vi må så langt vekk frå byggeplassen for godkjent deponering er naturlegvis eit tankekors.

– Men alternativa for deponering er få, for oss sto det mellom Sotra og Os, om lag same avstand. Vi valte Os, blant anna for å unngå den tette trafikken mot Sotra. No kjører vi jord, seinare skal vi kjøra stein.

Drange Maskin sitt oppdrag skal vera ferdigstilt i april 2014.

– Jord går til godkjent tipp i Hagavik, stein skal til knuseverket i Ådnadalen. Begge delar er jo ressursar, men det hadde naturlegvis vore ein fordel om vi kunne unngå så lang transport.

Vil ikkje kommentera

Fredag var det staseleg markering av byggestart på tredje byggetrinn av Bybanen.

– Fremtiden ligger i miljøvennlige og forutsigbare transportmidler, sa fylkesvaraordførar Mona Hellesnes (V) under opninga i dag, ifølgje BT.no.

At bygginga krev massiv tungtransport for å flytta jord og stein heile tre mil vekk frå byggeplassen, vil Venstre-politikaren førebels ikkje kommentera.

– Dette skal vera behandla i reguleringsplanen, som er godkjent for ei god tid tilbake. Men det du fortel er for tynt grunnlag, og eg kjenner ikkje detaljane i reguleringsarbeidet godt nok, til å seia noko om dette no, seier Hellesnes til Midtsiden.

Prosjektleiar hos Bybanen, Leon Fauske, seier det ikkje er noko å gjera med situasjonen.

– Det er fleire store prosjekt i Bergen, blant anna byggearbeida til Avinor. Seinare kjem drivinga av Ulriken-tunnelen, då blir det endå meir.

– Vi og entreprenørane må berre gjera det beste ut av det, og ta mest mogleg omsyn samtidig som vi er effektive.