– Det var min eigen feil
Gunnar Bøthun låg i toppen av Aurlandsfjellet Xtreme Triathlon, så rauk sykkelkjeda tvers av. Gunnar tapte minst ein time, men var berre eitt minutt seinare enn i fjor.
Bildeserie:
Gunnar Bøthun, Tore Engesæter og Tor-Inge Myklebust Lie var laurdag med på eitt av verdas tøffaste triathlon-løp, Aurlandsfjellet Xtreme Triathlon.
Bøthun, som deltok for andre gong visste at formen var god og låg godt ann etter 1,9 kilometer med symjing.
– Syklinga gjekk bra, men etter at eg hadde klatra 500 høgdemeter rauk sykkelkjeda tvers av.
– Eg hadde ikkje med meg nytt i reserve og prøvde å få hjelp, men det var ingen som kunne hjelpa meg.
Måtte snu
Bøthun måtte ta det tunge valet om å returnera til start for å prøve å få hjelp der. Utan å kunne tråkka, måtte han trilla sykkelen dei 500 høgdemetra ned.
– I startområdet var det ingen som hadde kjede.
– Du må gå på butikken var beskjeden eg fekk.
– Først var eg på ein sportsbutikk, men dei hadde ikkje, så blei eg vist til ein jernvareforretning 2 kilometer utanfor Aurland.
– Der hadde dei kjede, men ikkje som passa på sykkelen min.
– Eg fekk det likevel på og kunne starte syklinga på nytt, rett nok med berre nokre av gira som fungerte, fortel Bøthun, som av arrangørane blei køyrd opp igjen til der uhellet hendte.
Min eigen feil
Vel tilbake på sykkelen låg Bøthun absolutt sist og måtte berre starta å plukka konkurrenter.
– Det var aldri aktuelt å gje seg.
– At kjeden rauk var min eigen feil. Eg hadde ikkje kontroll på det.
– Hadde eg vore heldig hadde det røke på første treningstur etter triathlonen, men det var eg ikkje.
Med krampe
Stresset og jakta på å ta att konkurrenter gjorde at han slurva med å få i seg mat, i tillegg til at han sykla tøffare enn han hadde tenkt.
– Med ti minutt att av syklinga kom krampa.
– Heile halvmaratonen løp eg med krampe, så eg fekk litt ekstra å kjempe med.
– Då eg starta med løpinga satte eg meg mål om å klare same tid som i fjor. Det gjorde eg nesten. Eg kom i mål eitt minutt seinare enn i fjor og ein time og seks minutt etter vinnaren.
– Reint matematisk tapte eg ein time og fem minutt på at kjede rauk.
– Korleis det hadde gått om eg hadde fått sykla med dei som eg er jamngod med kan eg berre spekulera i.
Bøthun kom i mål på sju timer og førtifem minutt, noko som heldt til ein 45. plass.
Strålande nøgd
Ein som var strålande nøgd etter å ha kome i mål var Tor-Inge Myklebust Lie. Han hadde som mål å klara triathlonen på under ni timer.
– Tor-Inge er høgt oppe no, fortel Bøthun om kompisen som er i dusjen når Midtsiden snakkar med han.
– Han kom i mål på 8 timar og 12 minutt, så han klarte målsettinga med god margin.
Også tredjemann, Tore, klarte målet sitt. Med ni timer og atten minutt klarte han målet om å komma under ti timer.