Det vanskelege pensjonsvalet

Os kommune forlot for nokre år sidan KLP (Kommunal landspensjonskasse) til fordel for Storebrand når det gjeld pensjonsordninga for delar av dei tilsette i kommunen. Lærarane har framleis si ordning i statens pensjonskasse, medan sjukepleiarane har si gjennom KLP.

No har Storebrand varsla at dei legg ned si satsing på offentleg pensjon og kommunen må sjå seg om etter nye løysingar. Kommunen kan anten ta ansvaret for pensjonen sjølv ved å oppretta si eiga pensjonskasse eller dei kan konkurranseutsetja pensjonen i ei forsikra løysing.

– Det er ei vanskeleg sak å ta stilling til. Eg har ikkje falt ned på kva eg tykkjer.

– Pensjon er vanskeleg, slo ordførar Terje Søviknes (Frp) fast då formannskapet handsama spørsmålet i førre veke.

Risiko vs tryggleik

Valet av pensjonsløysing handlar på mange måtar kva risiko kommunen er villig til å ta. Skal ein ta sjansen på at uttaket av AFP held seg lågt, og at medarbeidarane ikkje blir uføre slik at utbetalingane held seg "på normalen" eller skal ein sikra seg mot "overraskingar" ved å kjøpa seg inn i forsikra ordning hjå kommersielle aktørar.

– Administrasjonen har falt ned på å anbefala ei forsikra løysing.

– Om vi opprettar vår eiga pensjonskasse, så vil denna vera ei av dei minste i landet.

– Fortenesten med eiga kasse vil vera liten. Vi såg i Fjell kommune kor lite som skulle til før heile bilete snudde seg.

– Pensjon handlar om sparing, risiko og kostnadar. Risikoelementa er hovudårsaka til at vi tilrår den forsikra løysinga, forklarte rådmannen.

– Eit lite land

Valet er ikkje lettare når ein veit at det berre er to tilbydarar av forsikra løysningar og også berre to som tilbyr administrasjon av pensjonskasse.

– Det viser berre at Noreg er eit lite land, og at markedet ikkje er så velfungerande som ein kunne ønskja seg.

– Kommunal verksemd egnar seg ikkje for å ta sjansar. Eg er difor komfortabel med ei forsikra løysing, argumenterte Lars Atle Skorpen (Ap).