- Det største som kan skje

Tiril er utøvar i greina New School (jibbing) på Norges Toppidrettsgymnas på Lillehammer, ei grein Nordahl-Pedersen frå Søre Øyane har vore sportsjef for i snart tre år.

- Det Tiril har prestert er heilt fantastisk, det er umogleg å forklara kor stort det eigentleg er, fortel ein entusiastisk og stolt sportsjef.

Etter å ha vore på X-games to år på rad, prioriterte han i år å halda seg heime får å få gjort unna kontorarbeid.

- Angrar du no?

- Ja, eg gjer nok det, seier han og ler

OL for ekstremsport

For dei litt uinvidde er X-games, kort fortalt, ekstremsporten sitt OL, og kanskje det største ein ekstremsportutøvar kan vera med på.

- Tiril kom inn som underdog, utan store sponsorar, og gjer ein utruleg prestasjon!

- For å samanlikna så gjorde Kaya Turski, som kom på 2. plass, eit av sine beste renn og likevel fekk Tiril betre poengsum i begge omgangane.

Kaya Turski frå Canada har vunne slopestylen i X-games tre år på rad.

Blei headhunta

Då Tiril var 14-15 år "headhunta" Nordahl-Pedersen ho til NTG.

- Eg hadde høyrd om ei jente frå Geilo som var så god på ski, så eg møtte ho og mora hennar og anbefalte Tiril å søkja plass på NTG.

Året etter kom Tiril inn på skulen og ho, Kenneth og dei to andre trenarane har sidan jobba knallhardt saman for å utvikla talentet hennar.

- Tiril er heilt rå, ho set seg høge mål og jobbar intenst for å nå dei, utan å vera redd for noko.

Har draumejobben

Kenneth, som no bur saman med sambuaren Live på Lillehammer, har tidlegare tatt bachelorgrad i Sport Management på Norges Idrettshøgskole i Oslo. Jobben som sportsjef i NTG søkte han på før han var ferdig utdanna, så då han var ferdig gjekk turen rett frå skulebenken til ny jobb.

I jobben har han ansvar for blant anna organisering av treningsopphald, økonomi og personale, i tillegg til å ha ein trenarfunksjon for sine 30 utøvarar.

- Det er mykje jobb, men eg vil seia eg har drøymejobben.

- Eg styrer mi eiga arbeidstid, er mykje ute og reiser og så får eg betalt for å stå på ski!

Sjølv har han stått på ski så lenge han kan hugsa, og han har reist mange timar for å kunne dyrka interessa.

- Men det var ikkje noko organisert då når eg var yngre.

Blir verande

Det ser ikkje ut som at Kenneth vil venda nasa mot heimbygda med det første, i alle fall ikkje for å endra adresse.

- Eg saknar Os, men det må det skje ei global nedfrysing for at det skal bli forhold som får meg til å flytta heim igjen, seier han spøkjefullt.

- Eg er nok alt for glad i ski og snø.

- Men det finnest ikkje enn betre plass enn Øyane, så eg reiser heim så ofte eg kan for å nyta sjølivet, som eg også er veldig glad i.