– Det starta med ein rutsjebane
Dei siste åra har Varhaug Barnehage blitt kraftig opprusta. – Vi lagde ein treårsplan og resultatet har skapt smitteeffekt, seier Tor Erik Wiik.
Bildeserie:
Det er drygt tre år sidan Varhaug barnehage ville ha ny rutsjebane. Dagleg leiar Tone Fjeldstad fann produkt frå Sik Holtz ho hadde sans for, og den norske leverandøren sette ho i kontakt med Tommys Hage og Anlegg AS for montering.
– Medan vi heldt på kom dagleg leiar Tone Fjeldstad og fortalte om fleire ønskje. Saman lagde vi ein treårsplan, som har blitt revidert litt etterkvart, men som har ført til eit fint resultat, fortel anleggsleiar Tor Erik Wiik frå Tommys Hage og Anlegg.
– Som foreldreeigd barnehage er det kanskje enklare å planlegga langsiktig, vi har ingen eigarar som skal ta utbyte eller finn andre årsaker til å endra planane. Vi starta nøkternt og driv framleis varsamt, men no var det rom for oppgradering, seier Fjeldstad.
Meir open - men framleis skjerma
Siste prosjekt har vore skjerminga mot Industrivegen, ein vegg som var moden for utskifting, og som ikkje skulle opp igjen i same form.
– Varhaug barnehage ligg på ei lun og godt skjerma tomt, men veggen var litt høg og den sperra litt for mykje begge vegar, for både lys og innsyn. Det var sånn at du måtte inn i barnehagen for å sjå korleis den ser ut, seier Wiik.
Fjeldstad hadde klare tankar om korleis ein ny mur og vegg kunne sjå ut. Wiik teikna ein ny vegg i tråd med tankane til Tone, i tilsvarande stil som leikeapparata, og justerte denne saman med leiinga i Varhaug til resultatet som sto ferdig før sommaren.
– Vi har fått mange fine kommentarar til veggen, og spørsmål om kva type vegg dette er. Det er kjekt, synes Tor Erik.
– No når barnehagen har blitt så fin på innsida blei dette nesten som ei avduking. Dessutan er det kjekt for ungane med litt utsyn, bossbilen er spennande når den kjem forbi og det er kjekt å sjå om nokon går langs vegen med ein hund, legg Tone til.
Erstatta EU-singelen
Til blant anna barnehagar og borettslag er det fleire tryggleikskrav, som til singel og tryggleikssone under og rundt leikeapparat.
– Underlaget skal ikkje vera for hardt, så det må brukast EU-singel, og denne skal skiftast eller vaskast kvart år. Det er kostbart og arbeidskrevjande.
– Men for 5-6 år sidan blei det tatt i bruk meir heilstøypt fallunderlag i Noreg, noko som har vore brukt i England i rundt 30 år. Dette er nærmast vedlikehaldsfritt og varer i 15-20 år. Playtop, som vi er forhandlar for, gjev 10 års garanti på sitt dekke, og dette blir stadig meir brukt.
Etter at Tommys Hage og Anlegg, som stort sett har jobba i Bergen sidan starten i 1996, la Playtop i Varhaug, har fleire i Os kome til.
– Vi har lagt same dekke på ein leikeplass i Varåsen og 90 kvadrat i ein annan barnehage i Os. Der skal vi inn igjen etter ferien og legga nye 100 kvadrat, seier Wiik.
Les òg: Små og store i 20 år