– Det finaste eg har selt
Tysdag fekk Os kommune skjøtet på Raudlio/Stokkedalen. – Eg er glad det er Os kommune som tar over, seier Nils Lygre i Statskog.
Bildeserie:
Med berre 10 dagars margin i høve kontrakta fekk Os kommune konsesjon på å ta over den 10 000 mål store området i Raudlio/Stokkedalen.
Tysdag overleverte Nils Lygre frå Statskog skjøtet, det synlege beviset på at kommunen no er rettmessig eigar.
– Det var nok nokre i Statskog som håpa på at tida skulle renna ut.
– Dei meinte vi selte det for billig.
– Personleg er eg særs glad for at konsesjonen gjekk i orden og at det er Os kommune som overtek.
Bli med inn i mystiske og magiske Raudlio.
– Sjølv om vi har allemannsretten i Noreg, så trur eg tilrettelegging for friluftsaktivitet og bruk av området vil vera lettare med ein offentleg eigar, helsa Lygre då han overleverte skjøtet på dei fire gards- og bruksnumra kommunen har kjøpt til ordførar Terje Søviknes (Frp) ved ei lita markering på Raudlibøen tysdag formiddag.
Ærbødig og audmjuk
I strålande sommarvêr var det ein ærbødig og audmjuk ordførar som fekk det synlege beviste.
– Då eigedomen blei lagt ut for sal var vi i stuss. Kva gjer vi?
– Vi såg kor viktig det var å ta vare på området som det kjempestore frilufts- og skogsområdet det har vore, og er.
– Her vil det vera moglegheit for jakt, fiske, camping, friluftsliv og å oppleva dyrelivet på nært hald.
– Eg trur verdien av det vil bli berre høgare og høgare.
Samstemte politikarar
Søviknes fortalde om samstemte politikarar då spørsmålet kom opp.
– Dette var ein unik moglegheit for det politiske nivået.
– Det var ikkje vanskeleg å samlast. I tillegg har vi fått god hjelp frå mange, frå fylkesmann og fylkeskommunen til jakt-, fiske- og friluftsorganisasjonane.
– Vi blei veldig begeistra då vi fekk tilslaget.
– Dette har eit generasjonsperspektiv vi skal ha stor respekt for, fortalde ordføraren.
Forvaltningsplan og avtaler
No startar arbeidet med å få på plass avtaleverket med Bergen Skog og Træplanteselskap, Bergen og Omland Friluftsråd, Jakt- og fiskeforeningane.
– I tillegg må vi utarbeida ein forvaltningsplan.
– Vi har jo aldri eigd skog av denne dimensjonen.
– Det er jo nesten eit paradoks at eg, når eg er på austlandet i partisamenheng, snakkar om å selge skog for å betre kommuneøkonomien, så går vi motsatt veg her i Os.
– Det viktige no blir jo å skjøte den skogen som er her inne på ein god måte, avslutta Søviknes.