– Det er ein grunn til at du er tatt ut

Fredag 7. juli blei Ole Martin «Olis» Lekven Kolskogen (16) frå Os Fotball tatt ut i landslagstroppen til fire G16-kampar på Island.

Førstkomande fredag reiser Olis og resten av Noreg til Reykjavik for ni dagar med trening og kamp.

– Eg gler meg til både kampane, trening, det å oppleva Island og å vera på tur med landslaget, seier 16-åringen.

Mens A-laget til Os har pause trener han denne veka med Brann sitt G16-lag. Der er òg to andre frå landslagstroppen, i tillegg har Olis sin treningskamerat i klubb og på kretslag fram til Kolskogen hamna på A-laget, Tobias Nøss, vore med på Brann-trening.

– Det har vore veldig kjekt å trena med Tobias igjen, det har eg sakna, seier Ole Martin.

8 år sidan sist

I nyare tid har blant andre Erik Monsen (på slutten av 80-talet), Bjørn Dahl (med U21 i 1998 og 1999 og éin kamp med seniorlandslaget i 2004) og Åsne Takle Eide (16 kampar frå 2010 til 2013) frå Os spelt med flagg på brystet.

Det er 8 år sidan sist ein gut frå Os var tatt ut i ein aldersbestemt landslagstropp, Bjarte Haugsdal spelte 4 kampar med G17 i 2007, 5 med G18 i 2008 og 2 med G19 i 2009.

Med G18 fekk Bjarte òg oppleva å skåra med flagg på brystet (4-3-siger over Bulgaria).

– Viktig å våga

Bjarte Haugsdal, som gjekk frå Os etter nedrykket i 2008, til Brann, har seinare spelt for Løv-Ham, vore kaptein på Stabæk og, sidan 2014, spelt for Nest-Sotra, som no er eitt poeng frå tabelltoppen i PostNord-ligaen (2. divisjon).

– Korleis opplevde du å spela landskampar?

– Eg hugsar at det var veldig stort å bli tatt ut, og litt spesielt å vera frå ein liten klubb som Os. Å reisa, trena og spela med så mange gode spelarar frå heile landet var veldig lærerikt, du veks ein del på slike erfaringar.

Haugsdal spelte saman med blant andre Pål André Helland (108 kampar for Rosenborg) og Jo Inge Berget (73 kampar for Molde).

– Har du nokre råd til Ole Martin, som no skal spela sin første landskamp?

– Ikkje ver varsam. Det er viktige kampar, men ikkje SÅ viktige. Våg å prøva å visa deg fram, våg å risikera å feila, det kan du læra av. Lytt til råda og tilbakemeldingane du får.

– Eg ønskjer Ole Martin lykke til! Hugs at det er ein grunn til at du er tatt ut!

Fire kampar mot tre nasjonar

I løpet av dei ni dagane skal Olis og Noreg spela mot tre ulike nasjonar. Når alle har spelt mot alle er det ein plasseringskamp for å rangera dei fire ungdomslandslaga.

Sånn er oppsettet:
Polen - Norge søndag 30. juli
Island - Norge tysdag 1. august
Nord-Irland - Norge torsdag 3. august

Kolskogen har aldri vore på Island før, men han har hatt ein prat med lagkamerat Endre Brenne, som har vore proff på sagaøya.

– Vi skal spela på same banar som han har spelt på. Eg håper òg det blir tid til å sjå litt av Island mens vi er der, seier Ole Martin.

– Men det viktigaste er det sportslege. Eg er frisk og skadefri, spent på nivået, men gler meg veldig til å spela mot andre nasjonar!