– Det er de som bestemmer

Måndag kveld inviterte Os kommune til ope folkemøte i Tunet Kyrkje- og kultursenter for at Asplan Viak skulle få presentere moglegheitsstudien dei har gjort for Finnebrekka.

Mellom 100 og 150 møtte fram for å høyre kva konsulentane hadde å fortelje, og for å kome med sine umiddelbare tilbakemeldingar. Her var både grunneigarar, eigedomsutviklarar, utbyggarar og eigedomsmeklarar.

– Deko må bruke stemma dokker, det skjer så mykje i Os. Korleis skal Osbygdo vera, korleis skal vi bygga?

– Det er grunnen til at vi hadde ei konkurranse ute og gav Asplan Viak oppdraget. Dei skulle sjå på moglegheitane og skulle koma tilbake med noko som kan la seg realisera, heilt eller delvis, smått eller stort, men det er doke som bur der som eig området. Det er ikkje vi i kommunen som skal inn og bygga.

– Om de er interessert il å utvikla eigedomane doke, så snakk med naboen over hekken og bli eining, så skal vi få det til. Vi vil berre legga til rette, med infrastruktur og offentlege områder, innleia kommunalsjef Aina Tjosås før Audun Hammersland frå Asplan Viak drog gjennom rapporten.

– Vi såg på to scenarier, men forkasta ganske raskt ei høg fortetting, då marknaden ikkje er til stades for det no. I staden såg vi på ei middels fortetting kor ein ikkje riv nokon av husa som står i dag, kor ein gjer færrest mogleg dyre terrenginngrep og færrest mogleg dyre vegar. Det gjer at også lokale byggmeistre kan vera med i konkurransen om å bygga, noko som kan gjera utbygginga billigare.

– Det er plass til fortetting. Os er ikkje så tett som New York, så her bør det vera rom for å gjera noko, påpeika Hammersland då han presenterte andel offentleg areal per bebuar.

Les heile rapporten her (ekstern lenke)

Såg ikkje på sola for berre hus

Kari Dale Pedersen var den første av tilhøyrarane som tok ordet etter at presentasjonen var ferdig.

– Eg saknar solstudie i rapporten. Om ikkje det hadde vore for opningane mellom husa slik som det er i dag, så hadde både Orrebakken og Finnebrekka vore mørklagt, påpeika ho.

– Det kjem an på kor mykje ein fortettar. Vi har ikkje gjort ein solstudie på det. Men det er noko kvar enkelt grunneigar må tenke gjennom. Denne studien er ekstrem versjonen, svara Hammersland før Tjosås forsikra om at det var ting ein vil sjå på når ein kjem til områdeplanen.

Usamde i prisane

Fleire av utbyggarane og eigedomsutviklarane kommenterte at prisen på 21.000 kroner kvadratmeteren som Asplan Viak hadde nytta var for låg. Dei meinte at rett pris meir var mellom 40 og 60.000 kroner kvadratmeteren.

– Rapporten legg til grunn maks tomtekostnad på 250.000 kroner per bueining. Dette er feil. Ein tomannsbustad ligg på frå 400 til 800.000 per eining. Rekkjehus/leilegheitstomter vil naturleg ligga mellom 300 til 600.000 per eining, meinte Paul Drageset, som òg kommenterte at for Lien-tomta sin del så ligg det allereie ein godkjent reguleringsplan og søknaden om rammeløyve er levert.

– Det er ikkje marknad for store høge fortettingar no. Den prisen vi har lagt til grunn er den vi ser i dagens marknad. Dette er ikkje pris per kvadratmeter buareal, men prisen per kvadratmeter brutto tomt, svara Hammersland.

– Når det gjeld Lien-tomta så skal vi sjølvsagt retta opp i fakta feil.

Vil ha bru

Tilhøyrararane var også innom om dei hadde tenkt på at Oselvo er eit verna vassdrag og at grunnen i området består av mykje kvikkleire.

– Bruen er veldig bra, men korleis er det tenkt i høve overvatn og hovedvatn, lurte ein.

– Det har vi ikkje sett på. Det viktigste var å få bruen og koble Finnebrekka på Os sentrum til Bydraget, svarte Hammersland.

– Men kan vi vera samde i at bru er ein god idé, repliserte Tjosås og fekk aksepterande nikk frå salen.

– Når det gjeld det veran vassdraget så er vi klar over det, også over flaumproblematikken. Det finst løysingar og elvemuslingen og fisken skal vi ta vare på, forsikra Tjosås.

– Kva med fortetting ved brua, står det ikkje naust der i dag. Korleis tenkjer ein i høve dei fine nausta som er der i dag, undra Norvald Kobbeltvedt.

– Vi skal ikkje riva nokre naust uten at dei som eig dei ønskjer det sjølv, forsikra Tjosås.