– Det er alltid kjekt å treffa «Peder'n»

Då senterleiar Anne Kristine Tøsdal og dekoratør Anette Berge Brunvatne marsjerte inn på Spar-butikken på Amfisenteret for å overraska servicehelten sto han opptatt i munter dialog med eit ektepar på handletur.

– Det er vel fortent, kom det frå kundane Sissel og Arne Jargren, då dei fekk høyra kvifor senterleiinga kom med bukett og gåvekort til Peter.

– Eg visste ikkje om kåringa og har ikkje fått stemt på han, men eg har tidlegare vore kollega med Peter og det er alltid kjekt å treffa han, seier Sissel.

50 nominasjonar

Kåring av Årets Servicehelt er eit nytt tiltak ved senteret, som med 430 tilsette samla sett kanskje er den største arbeidsgjevaren i Os etter kommunen.

– Vi adopterte ideen frå eit anna senter. Vi likte ideen og synest det er viktig å gje merksemd til dei som gjer ein ekstra innsats med det å gjera handleopplevinga hyggeleg, seier senterleiar Anne Kristine.

Via facebook har dei bedt kundane koma med nominasjonar. 5300 har sett kampanjen, 50 av dei har sendt inn forslag på kven som fortener tittelen.

– Det var stor breidde og mange gode forslag, også andre tilsette på Spar. Men heile 10 av 50 nominerte Peter, fortel Anette, som var del av juryen saman med andre frå styret.

Munter, pratsam og lojal

Ved sidan av alle nominasjonane synest juryen det er eit pluss at Moesgård alltid er full av initiativ når det er arrangement på senteret.

– Han baker og griller og legg sjela si i at alle skal ha det bra. Det gjeld også i uttak av varer, det er ikkje utan grunn at han selte mest pinnekjøtt av alle i Os før jul, seier Tøsdal.

Sjølv tok Peter prisen med eit smil – men presierer at han ikkje er den einaste muntre tilsette ved Spar.

– Det er klart vi må vera i godt humør og prata med kundane, då blir arbeidsdagen også kjekkare.

– Det er ingen som klarer å vera billigast på alt, men vi vil at kundane skal ha ei god oppleving av å vera her, seier Årets Servicehelt.