Denne har du aldri sett før!

Bildeserie:

Full skjerm

1 av 11

I dag starta marknadsdagane i Os og ein av utstillarane er ekstra stolt over varene han viser.

– Bilen har ikkje vore innom butikken ein gong. Han er nett kome til Noreg og tre bilar kom over fjellet til Vestlandet i natt, seier Geir-Magne Johnsen frå Møller Bil Nesttun.

– VW eGolf har ikkje hatt noregspremiere, så vi kan nok kalla utstillinga vår på Os for ein norsk snikpremiere, seier han med eit stort smil.

Osingen Geir-Magne jobbar mest med nyttekjøretøy og viser vidare til kollega Erik Michelsen når det kjem til salstal og tekniske data på elbil-versjonen av Golf.

Selte 1200 første dag

VW eGolf blei sleppt på den norske marknaden i slutten av februar. Responsen er eit fenomen i seg sjølv.

– Den selte 1200 eksemplar første dag og har til no, før levering i Noreg, selt rundt 2000, fortel Michelsen.

– Berre på Nesttun har vi selt nærmare 200 eksemplar. Dei som er rask og bestiller no vil truleg få bilen sin produsert i år og kanskje levert rundt årsskiftet.

– Kva trur du er årsaka til den enorme responsen?

– Golf har i mange år vore Noregs mest selte bil. Den er tøff, fin og praktisk, Golf appellerer til alle, frå 18-åringar til pensjonistar.

– Når denne no kom som elbil, og prisen ikkje er særleg mykje høgare enn den litt mindre VW e-UP, som også har selt bra, forstår eg at folk bestiller.

115 hk og mykje utstyr

eGolf startar på 255.000 kroner i pris. Stappar du bilen full med utstyr landar du på rundt 300.000 kroner.

– Mykje utstyr er standard, som LED-lys framme og bak og den største versjonen av touchskjerm med navigasjon.

– I ein vanleg Golf må du betala 17.000 berre for skjermen.

Av ekstrautstyr som kan vera verdt å skaffa seg er skinnsete og ryggesensorar med kamera.

VW eGolf kjem med éin motor, som er på 115 hk.

Sport og nytte

Møller stiller med 12 bilar i utstillinga i Os sentrum.

VW nyttekjøretøy har med tre bilar, dessutan er det Skoda og Audi i utvalet.

– Vi har med spreke Audi S3 med 300 hk, til ein startpris på 750.000 kroner, og nye A3 cabriolet, fortel Stig Inge Olsen.

– Også Audi kjem med ny elbil, til hausten får vi inn A3 plug-in hybrid, som startar på rundt 350.000 kroner.

Av praktiske årsaker blir det ikkje prøvekjøring under marknadsdagane, men ei stor utstilling å sjå på blant dei til saman rundt 50 utstillarane.