Deler ut 6,1 millionar til næringslivet i Bjørnafjorden
Regjeringspartia sa ja til Frp sitt forslag.
Regjeringspartia og Frp blei før helga einige om ein krisepakke på 1,75 milliardar kroner, delar av desse som koronastøtte til næringslivet.
Av denne milliarden kjem 6.076.661 kroner til Bjørnafjorden kommune.
– Formålet er å gjera kommunane betre i stand til å finansiera ei beredskapsordning ved akuttsituasjonar. Regjeringen sitt forslag om to gongar 500 millionar er auka til totalt 1.750 millionar, seier Hans Andreas Limi, FrPs finanspolitiske talsperson.
– Bergensregionen har saman med Austlandet vore hardast ramma av nedstenging, så dette er viktige midlar, legg stortingsrepresentant Helge André Njåstad (Frp) til.
Tapt varelager blir tatt inn i kompensasjonsordninga frå mars. Midler som blir betalt ut i denne ordninga kjem ikkje til fråtrekk i andre kompensasjonsordningar.
Måndag såg førebels fordelingstabell sånn ut for Vestland:
Bergen ca 70 mill
Øygarden ca 10 mill
Askøy, Bjørnafjorden og Alver med ca 6 millionar kvar.
– No må pengane koma raskt fram til dei som treng dei, seier Ove Trellevik (H), medlem av kommunal og forvaltningskomiteen.
