Dei yngste spelte for dei eldste
Dagen før opning kom elevar frå Os kulturskule for å spela i tropehagen på Luranetunet.
Bildeserie:
– Det blir keyboard, gitar og litt song, seier lærar Jon Søfteland Sæbø.
Måndag ettermiddag, dagen før offisiell opning, stilte han i den nye tropehagen på Luranetunet med rundt 30 elevar.
– Dei fleste er ferske, nokre av dei starta no i haust. Dei mest erfarne eg har med meg i dag har øvd i 2-3 år.
Ein av dei nyare elevane hans, Gard Lystad Askeland (10), byrja å spela gitar for eit halvt år sidan.
– Dette er andre gong eg speler for eit publikum. Eg er litt spent, sa Gard før konsertstart.
Elevane klarte seg veldig bra! Sjå delar av dei tre første låtane i videoen over.
– Kjekt å vera «ute»
Aktivitetskoordinator Grete Byrkjeland frå Os kommune seier fleire av dei større arrangementa no blir flytta til tropehagen.
– Vi vil halda fram med å ha bingo der vi har vore før, men synest det er flott å no kunna arrangera konsertane «utandørs» i den nye, store hagen under glastaket.
Fram mot jul blir det ein serie med konsertar. Fonos, som òg song på offisiell opning i går, skal ha konsert tysdag om ei veke. Dagen etter kjem Os Swingklubb. «Skitnesøndagen», siste søndag før jul, er Os Mannskor tradisjon tru på plass, og måndag 18. desember kjem Os Vocalis.
– Samtidig er det viktig med dei små konsertane ute på avdelingane, hos dei som ikkje rører så mykje på seg. Vi har mange frivillige som stiller opp, blant anna Johannes Agasøster, som kvar fredag speler trekkspel på fleire avdelingar.
Os Røde Kors si besøksteneste har i ei årrekkje trilla rundt med salsvogn med kioskvarer på avdelingane annakvar tysdag. Denne blir no stasjonær ved Bambus Bar i tropehagen.
– Det er ei prøveordning der dei, i staden for å trilla rundt, stiller seg opp i hagen og gir dei eldre og sjuke ein god grunn til å bevega seg.