Christer sitt første låtslepp
Kan bli ein slager på Øyafest-vorspiela dei neste dagane.
På Øyafest i fjor debuterte Christer Sundøy Røttingen under kickoff i Humrahølo.
På frivilligfesten i januar i år lanserte han sin første, eigne låt «Øyasongen (Plassen som eg kallar heim)».
Søndag blei låten lasta opp på ulike plattformer, i dag kom den tilgjengeleg på den siste og største; Spotify.
– Det er tilfeldig at det blei så tett på festivalen, men det er jo kjekt om nokon kan ha glede av den på vorspiel dei neste kveldane, seier Røttingen.
Frivillig-kollega Kristian Bruarøy, som styrte lyden i Humrøhølo og på frivilligfesten, sendte Christer i studio og hjelpte til med opplastinga.
– Eg var i Duper Studio i mai. Martin Smoge er produsent, og han la på litt bass, og så har eg song og gitar sjølv.
– Har dette gitt meirsmak, at det kjem fleire låtar utover året?
– Eg har dikta og skrive litt, og eg synst det er kjekt, så du skal ikkje sjå vekk i frå at eg går i studio igjen. Men det er ikkje nokon konkret slagplan om noko meir foreløpig.
Frå artist til støttespelar
Sjølv går Christer glipp av årets festival, han reiser på Oseberg A torsdag.
– I fjor var eg redd for at det skulle bli uvêr, så eg ikkje kom meg heim til festivalen. I år kan det godt koma litt skodde, seier songaren og ler.
Men i no ser vêrmeldingane stadig betre ut, med opphaldsvêr torsdag, sol fredag og sol vekslande med lette regnbyger laurdag.
Han stiller uansett på dugnad før festivalstart.
– Det er veldig kjekt å vera med og hjelpa til, og rørande å sjå støtta og korleis generasjonar jobbar saman for å få festivalen i hamn.
Raske sal - rask rigging
Rigginga går, ifølgje festivalsjefane Tommy Aasen og Ivar Bøthun, raskt i år òg.
– Eldrebanden rigga ferdig i Humrahølo før klokka 10 i dag, dekket blei effektivt rulla ut og nett no står me 30 mann og ventar på nokre boltar frå Fusa så me får sett opp teltet, fortel Ivar.
Den siste veka har dei selt yttarlegare 100 billettar, og knappe 300 er igjen fire dagar før laurdag.
– Det var også ein kjekk og travel dag for dei som sto på stand for oss på Marknadsdagane på Os i helga. Dei selte seg nesten tom for merch, så no har me stengt nettbutikken og pressa går for fullt hos Team Baggen.
– Me har bestilt resten av varene dei hadde på sentrallageret han bestiller frå, sånn at me har gensarar og hattar å selja til helga òg.
