Byggestart for Fløysand
Fløysand Tak får ny kontorfløy ned mot E39.
Bildeserie:
Fløysand Tak har lenge hatt ønskje om, og behov for, utvida kapasitet i Industrivegen 63.
– Vi treng betre kontor- og møtefasiliteter, seier gründer og hovudaksjonær Gudmund Fløysand.
Selskapet er i vekst, og har nyleg utvida verksemda både i Trøndelag og i Sunnhordland.
Kan samla fleire firma
– Os Blikk og Fasade treng også større verkstad, då oppdragsmengda deira er aukande. I tillegg er firma frå fleire andre fag i kontakt med oss med ønskje om å leiga. Vi ser på denne formen for samlokalisering som ein fordel, blant anna fordi det kan føra til samarbeid om totalpakkar som marknaden ofte etterspør.
Det tok tid å få godkjent rammeløyve, men i november 2014 var dette på plass.
I september i år blei det søkt om, og godkjent, igangsetjingsløyve, og no er bygginga i gang.
15-20 nye kontor ved ny E39
Abo plan og arkitektur har teikna og søkt om løyvene, LAB er hovudentreprenør.
Nordvestenden av tomta, mellom eksisterande bygg og E39 ved det som blir starten på nye Svegatjørn-Rådal når denne opnar i 2022, er i ferd med å bli gravd ut. På tomta var det tidlegare parkeringsplass.
– Bygget blir på rundt 360 kvadratmeter og vil gje oss 15-20 nye kontor og møterom.
Bygget kjem under bakkeplan på eksistarende bygg, under det som tidlegare var parkeringsplass, med heissjakt opp til øvre gateplan. Utbyggar vurdera å søkja om ei endringsmelding for å skapa tørrskodd tilkomst mellom nybygg og eksisterande byggmasse.
Det nye kontorbygget skal stå ferdig våren 2018.