Bygger lager på 1000 kvadratmeter

Bildeserie:

Full skjerm

1 av 2

Vestafjell Holding AS, som har adresse i Midtunhaugen, leiger lager og produksjonshall av Kolskogheiane 19 AS, eit heileigd dotterselskap av Bøe & Lepsøy AS, som eig 89,41 % av Vestafjell.

Når E39 Svegatjørn - Rådal skal byggast er ikkje hallen like godt eigna lenger.

– Vegsystemet kjem så tett innpå hallen at vi ikkje lenger kan kjøra lastebil rundt heile. Då kan vi ikkje bruka den på same måte som i dag, forklarer Morten A. Hansen, administrerande direktør i både Vestafjell Holding og Bøe og Lepsøy.

Statens vegvesen overtar hallen i Kolskogheiane.

– Eg er ikkje sikker på om det er bestemt kva dei skal bruka det til, men det skal vera tilbydd som riggområde.

Rett over ferien byrjar Bøe & Lepsøy AS bygginga av ein ny hall i industriområdet i Hegglandsdalen.

Frå 600 til 972 kvadratmeter

Lageret i Kolskogheiane er på rundt 600 kvadratmeter, det nye bygget blir 18 x 54 meter, 972 kvadratmeter stort på grunnflata.

– Vi kjem til å legga til rette for to etasjar med kontor som vi vil innreia om vi får leigetakar til dei.

– Ei av årsakene til at vi valte å bygga i Hegglandsdalen er at det allereie låg ferdige omsøkte planar. Prosessen blei rask, og det passa oss bra, vi kan vera i hus allereie i løpet av hausten.

– Med auka areal ligg det også til rette for utvida bygging av konstruksjonar til nybygg, under tak. Vi driv med dette i Kolskogen òg, men får langt betre kapasitet, i tillegg til lageret.

Blir bygd av naboen

Lokale verksemder skal bygga industrihallen for Bøe & Lepsøy.

Betongentreprenør Sveinung Borgen AS skal støypa mens Johs Sælen & Sønn AS, som held til på nabotomta, skal bygga hallen.

– Vi har levert til hallar i fleire år, men det har blitt stadig fleire oppdrag der vi bygger heile hallen, med både veggplater, tak, portar og vindauge, fortel dagleg leiar Tore Sælen.

Denne gong blir det svært låge transportutgifter.

– Det blir kjekt å bygga på nabotomta, vi ser fram til både å byrja på bygget over rett over ferien og til å få Vestafjell som naboar, seier Sælen.