Bygger kryss på Byvegen

Over 400 nye bustadar skal byggast i Hjellemarka og dei første har reist seg.

I tillegg til Block Watne, som kom først i gang, er det snart innflytting i Bøe & Lepsøy Utbygging sine første hus i området.

– Dei første 11 har innflytting 15. november, dei neste 9 er klare i mars.

– Vi har selt 18 av 20 i felt B5 og har vedtatt oppstart av B6, der over halvparten er selt. B6 blir bygd i eitt trinn og blir ferdig rundt årsskiftet 2014-2015, fortel direktør Steinar Jensen i BLU.

No er også Markhus i gang

For to veker sidan la den tredje utbyggaren i området, Markhus Boliger, ut sitt første felt.

– Vi startar med dei to første blokkene og ein 4-mannsbustad, 20 hus i alt, seier eigedomsutviklar Monica Helene Hansen i Markhus Boliger.

– Det er berre eit par dagar sidan vi starta annonseringa, og har allerei selt 5-6 hus.

Storleiken varierer frå 40 til 83 kvadratmeter, prisane frå 1.450.000 til 2.790.000.

– Vi byr på nokre i svært låg prisklasse, og det har slått an. Men vi har selt i alle prisklassar til både osingar og folk frå by'n.

Nytt kryss – ny barnehage

Det blir rundt 1000 fleire søftelendingar når heile Hjellemarka er bygd ut, og allereie neste år er det plan om å opna barnehage i det nye bustadfeltet.

– Vi har ikkje hatt tilgang til tomta vår før no, men kan endeleg senda ut nabovarsel, seier rågjevar i Trygge Barnehager, Tor-Hasse Paulsen.

Trygge Barnehager håper på byggestart i vinter og opning ein gong på hausten i 2014. Då skal Hjellemarka FUS Barnehage, som allereie er godt etablert i midlertidige lokaler nær Søfteland skule, flytta til Hjellemarka.

Krysset som er under bygging skal stå ferdig 15. november. Det er Bøe & Lepsøy Utbygging og Vestafjell som står for vegbygginga.

– Krysset blir ferdig om to veker, men vegen inn i feltet er ikkje ferdig og krysset skal ikkje bli tatt i bruk før ut i 2014 ein gong, seier Steinar Jensen.