Bygger konditori og musikkbar i Brugata
Lokale krefter frå Strøno, konditormeister Hanne Hansen og mannen Bjørn «Bosse» Sigurjonsson, vil skapa nytt liv i Lepsøe-lokalet.
Bildeserie:
Det er over 20 år sidan Hanne Hansen byrja som lærling ved Hagavik Hjemmebaker, der ho i dag jobbar som konditormeister og produksjonssjef.
Tanken om å starta for seg sjølv var ny i januar, men no er Hanne's Konditori & Musikkbar AS sin serveringsstad under bygging i Brugata i Os sentrum.
– Initiativet kom frå gutane, seier Hanne om mannen Bjørn «Bosse» Sigurjonsson og ein kamerat.
Bjørn og kameraten, som begge har musikk som hobby, ville starta bar. Samtidig er det greit å ha fleire bein å stå på.
– Konditori og musikkbar er kanskje ein litt spesiell kombinasjon, men vi håper det kan fungera fint med litt ulik drift gjennom veka.
– Det blir veldig vanskeleg å gå frå Hagavik Hjemmebakeri etter så mange år. Eg er glad i både plassen og folka her ute, men no er ungane blitt store og tida er kanskje inne for å prøva noko nytt.
Nybakt frukost
Dei tre gründerane har ambisjonar om å opna innan 1. mai. Bygginga av kjøkken og bar er godt i gang og i dag tidleg kom Bjørn tilbake frå Sverige med ein lastebil fylt med møblar.
– Alt av planar er ikkje spikra, men eg trur vi vil halda ope frå morgonen av, at folk både kan koma på frukost og vera tidleg med henting av bestilte varer, seier Hanne.
På dagtid blir det ope konditori med sitjeplassar.
Akustisk livemusikk kvar helg
Bjørn har brukt dei siste vekene godt, og det tidlegare Fisker-Lepsøe-lokalet har byrja å få ny form, blant anna med ein eigen krok til scene.
– Vi har søkt om skjenkeløyve og ønskjer å få ein god uteplass for folk som er glade i musikk.
Sjølv speler han munnspel og under festivalar i Os er det sosialt og livleg om bord i båten hans.
• Les òg: – Her er det inga billettløysing (med video, frå Osfest 2015)
– Det skal ikkje bli til langt på natt, vi vil nok runda av rundt midnatt. Dette kan bli ein fin vorspielplass, der du får ein halvliter som faktisk er 0,5 liter, og akustisk musikk så du kan føra ein samtale utan å måtta ropa.
– Det er tett med gode musikarar i Osbygda, og eg har snakka med mange av dei allereie. Vi vil ha livemusikk kvar helg, frå pop til blues og jazz, så eg får setja opp ein speleplan så vi får god variasjon, seier «Bosse».