Bygde tre klasserom i natt

82 meter lange MS Tinto ruva i Os hamn då dei lossa 10 store pakkar med byggesett om bord på tre bilar som gjekk i skytteltrafikk til Os vgs.

– Eg visste at leveransen skulle koma i går, men ikkje at det blei så mykje byggeaktivitet i natt, seier avdelingsleiar for bygg og anlegg ved skulen, Johan Lassen.

I dag kom han på jobb til ferdigbygde brakker på skuleplassen.

Tre nye klasserom

Brakkene skal husa lærarrom, toalett, garderobe og tre klasserom.

– Dei er ferdig montert. No blir det cirka 10 dagar med tømrararbeid innandørs før elektrikarar og rørleggarar overtar, så det blir ei lita stund til vi har innflytting.

Dei nye romma er ikkje ei kapasitetsauke ved skulen, dei skal erstatta dei eldre brakkene som ligg nærmare Ulvenvatnet. Desse har dårleg stand og ligg dessutan der ein ny veg skal byggast.

Elevane deltar

Elevane som skal bruka klasseromma har sjølv deltatt i byggerelaterte førebuingar.

– Grunnarbeid, fundament og understell er bygd av elevane, og no når brakkene står der skal dei bygga skjørt og stella til veg og grøntområda rundt, fortel lærar Rune Nilsen.

Del av større prosjekt

Klasseromma i brakkene er midlertidige, men lærarane legg ikkje skjul på at dei ser for seg at desse blir brukt i ganske mange år framover.

Brakkene er ikkje einaste byggetiltak på skulen, men del av stor omstruktirering av både bygg og uteareal.

– Skanska har tatt brakkene, Markhus held på å skifta vindauge og Prosjekt Vest Bygg lager heissjakter. I tillegg skal det byggast ny veg for anleggstrafikk, fortel Johan Lassen.