– Burde vore saldert

Etter nokre år med sjukefråvær og fleire ledige stillingar er no barnevernstenesta i Os kommune fullt bemanna og har godt driv i arbeidet med å hjelpa barn, unge og familiane deira.

- Eg er veldig godt fornøyd med det arbeidet som gjerast i barnevernet i dag.

- Vi kan ikkje ta ned noko fart på dei tiltaka som er gjort frå 2011 til 2013, men det er ikkje rom innanfor området til å ta dei økonomiske konsekvensane, forklarte Ingvar Torsvik, kommunalsjef for oppvekst og kultur.

Allereie i august 2012 varsla Torsvik at barnevernet gjekk mot eit meirforbruk, då på omlag 2 millionar kroner.

Tiltak utanfor heimen kostar

Utfordringa for Torsvik, og politikarane er at barnevernet i 2012 gjekk med eit meirforbruk knytt opp mot tiltak utanfor heimen på 4,5 millionar kroner. Om ein ser heile barnevernstenesta under eitt enda meirforbruket på 3,9 millionar, noko Torsvik vil helda fram i 2013.

- Eg er særs nøgd med at tenesta held budsjetta sine på den reine drifta. Tiltak etter lova er det vanskelegare å gjera noko med.

Eit tankekors

Helge Olav Nygard (KrF) reagerte i tenesteutvalet tysdag på at meirforbruket ikkje var budsjettert inn for 2013 all den tid ein visste at situasjonen ville bli nokolunde lik.

- Det er godt at varselet kjem så tidleg på året, men samstundes kjem det rett etter at vi er ferdig med budsjettprosessen.

- Det er eit tankekors, både for oss politikarar og administrasjonen, meinte Nygard.

- Dette drøfta vi på budsjettkonferansen på Stord i fjor haust. Vi kunne ha saldert budsjetta, men eg tilrådde å ikkje gjera det fordi eg meiner det er viktig å synleggjera det auka aktivitetsnivået og kostandane.

- Hadde vi saldert det er eg redd for at vi fort hadde gløymt tiltaka vi hadde gjort sidan 2011, svarte Torsvik.

Lurar seg sjølv

Nygard forsto kommunalsjefen sitt behov for å synleggjera barnevernet sitt arbeid.

- Men uansett endar vi opp med at nokon må gje.

- Dette er ein merkeleg måte å lura seg sjølv på. Vi kan gjerne synleggjera det, men eg slit med å følgje logikken bak ikkje å saldera det i budsjettet.

Han fekk støtte frå Anders Hjelle (TvS) som ønskja ei ny status på tenesteutvalet sitt siste møte før sommaren.

- Det er tross alt vi som politikarar som er ansvarlege for budsjetta, påpeika Hjelle.

Greit å overskrida

Sjølv om politikarane ønskjer at dei kommunale tenestene skal halde seg innanfor dei vedtekne budsjetta har dei forståing for at barnevernet kan ha problem med dette på tiltakssida.

- Er det eitt område det er meir ok å overskride budsjetta så er det på barnevernstiltaka, meinte Turid Oltedal Lunde (H).

Ho fekk støtte av Arild Mads Nilsen frå arbeiderpartiet.

- Penger er viktig, budsjettet er eit viktig styringsverktøy, men eg er einig med Turid i at om det er nokre områder man har underskot på så er det innanfor dette området.

- Eg er imponert over at vi har kome opp og stå i barnevernet, no er det berre å finna så godt som mogleg den rette balansen.