Bukk knuste bil
Dei siste fire dagane har det vore tre hjortepåkjørslar i Os. I går fekk ein familie på fire ein hjort på 120 kg inn frontruta.
Sundag i 20.30-tida blei ein hjort påkjørt på Moberg. Ein familie på fire på veg frå Halhjem fekk ein 120 kilo tung bukk i frontruta så den knuste.
- Eg trur ikkje dei i bilen blei skadd, men dei fekk seg nok ein god støkk, seier Espen Krüger Andersen. Politiet fann ikkje hendinga i loggen sin.
Hjorten blei funnen død kort tid seinare, i nokre buskar i Olavegen.
- Heldivis var den død og ikkje skadd, for sjølv om vi ved ettersøk etter påkjørsle har lov til å skyta i mørket kunne vi ikkje ha lausna skot i det terrenget der. Vi treng sikker bakgrunn uansett tid på døgnet, på Moberg er det ope og mange hus i bakgrunnen nesten uansett vinkel.
Prøvde å avliva med kniv
Andersen er ein del av det rundt sju mann store ettersøks-laget i Os. Kvar gong det blir varsla om påkjørsle er det folk frå dette laget som rykker ut, med godkjente og erfarne ettersøkshundar, for å leita etter dyret.
- I fjor var eg på 12 utrykkingar, ved 4 av dei fann vi dyret.
Som oftast finn dei dyret liggande, og er det sikker bakgrunn og dei kjem 30-40 meter frå dyret så skyt dei.
- Men det er ikkje alltid vi kan skyta. Ein gong låg det ein skadd hjort på Halhjemsvegen, med asfalt, fjellvegg, bustadar og bilar rundt kunne vi ikkje skyta, så eg prøvde å avliva den med kniv. Eg fekk kutta hovudpulsåra, men hjorten heldt fram med å kjempa imot. Til slutt måtte eg skubba den over autovernet for å avliva den med rifleskot.
- Meld ifrå og merk staden nøye
Kvart år er det rundt 10 påkjørslar av hjort i Os. Som det blir meldt frå om. Til no i år har det ifølgje Åsmund Austarheim på landbrukskontoret vore seks påkjørslar, fem av dei no på seinsommaren.
- Det er viktig at folk er flinke med å melda ifrå, så raskt som mogleg, og at dei er nøye med å merka staden der dyret spring ut av vegen, seier Austarheim.
Har søkelaget ein plastpose eller liknande å starta frå kan dei spara mykje tid.
- Av og til er det dessverre sånn at folk ringer etter at dei har kjørt frå staden. Då kan laget gå på timevis å leita etter det første sporet. Ring politiet på 02800, så tar dei kontakt med ettersøkslaget.
Tre påkjørslar på fire dagar
Torsdag kveld blei ein hjort påkjørt og seinare avliva i Os sør. Fredag kveld blei ein kalv påkjørt på Hetleflåten. Bilen hamna utpå bakkane, kalven blei funnen og avliva.
Fredag kveld var også underteikna nær på å få ein bukk i fanget. I svingane mellom Kolskogen og Ulvensletta, som nyleg blei utbetra, sprang hjorten i vegbanen før den tok turen ut på det graskledde området over grustaket, der vegen gjekk tidlegare.
VIDEO: Sjå hjorten som fredag slapp unna fronten til underteikna sin bil. (Foto: Kjetil Vasby Bruarøy)