Britisk nabolag gjorde hollandsk entré
96 år gamle Oosterschelde kom til Os måndag kveld.
Bildeserie:
Nederlanske Oosterschelde, ei av skutene som var i Bergen under The Tall Ships Races i juni, er tilbake i Hordaland, denne gong chartra av eit nabolag i ein landsby sør i England.
Sjå bildeserie og video frå då Statsraad Lehmkuhl var i Os i juni.
– Vi er 17 gjestar om bord, venar og kjente frå same landsby, fortel David Hampson-Ghani.
– Vi har hatt mykje stygt vêr, men det har vore ein flott tur. Først var på rundt Sørlandet, så var det nordover og inn Hardangerfjorden til Odda. I dag går turen vidare til Bergen.
Bestilte middag på Mobergsneset
Mellomlandinga i Os blei avgjort kort tid i forvegen og mannskapet om bord, som tel fem mann, søkte på nett for å finna ein plass å eta.
– Vi rota med å finna hamneinformasjon, men vi fann restauranten i Oseana og dei opna dørene for oss på kvelden i går.
– Vi hadde eit nydeleg måltid og såg eit stupebrett som enkelte blei freista av. I dag tidleg var det tre av oss som tok ein dukkert.
– Temperaturen var ikkje så verst, synest Eduardo Martin, ein av dei som jobbar om bord.
Hjelper til på dekk
Oosterschelde, som var ferdig bygd i 1918, er den einaste båten av sin type i Nederland. Skuta har blant anna hatt dansk eigar, men blei i 1988 kjøpt tilbake til Nederland og restaurert.
Lengde: 48,62 meter
Høgde: 31,09 meter
Rigg: Toppseil skonnert
Oosterschelde har plass til 120 gjestar på dagstur, men tar maksimalt med 24 overnattande gjestar på chartra turar.
– Fleire av oss som er med seglar mindre båtar på fritida og alle må vera med og hjelpa til, seier franske Christine-Louise Lasbareilles.
London – Middelhavet – Kapp Verde
I dag går turen frå Os til Bergen. Gjestane frå England skal fly heim mens skuta skal segla nokre turar til langs norskekysten før turen går til London for å segla på Themsen under ein festival.
– Seinare skal vi til Middelhavet, der vi er leigd inn som moderskip under ein regatta utanfor den spanske austkysten, fortel kaptein Maarten de Jong.
– Etterpå skal vi vidare til Kapp Verde, der vi har eit vinterprogram. Vi er ikkje heime i Nederland før i mars.