Brannsjefen vil opp i høgda

Høgdeberedskap, og utstyr til sløkking og redning i høgda, har vore tema i Os brann- og redningsteneste i lang tid. Stein Gjøsund, som blei tilsett som brannsjef i Os i 2003, skaffa året etter ei pute tilsvarande dei du ser folk hoppa på frå brennande hus på film.

– Men ei slik hoppepute er berre til bruk i ytterste nød. Det finnest til og med eksempel på at folk har hoppa frå 4. etasje i Oslo og delvis bomma på ei slik pute. Vedkomande fekk hovudet utanfor puta og omkom.

– Vi har fleire høge hus i Os, blant anna Os Sjøfront på fem etasjar, mens stigen vår så vidt rakk opp til kanten på det fire etasjar høge Sparebanken Vest-bygget då det brann på taket deira tidleg på 2000-talet.

Brannsjefen viser dessutan at det blir jobba med fleire reguleringsplanar i Os med hus som er høgare enn dagens plan for sentrum, tre etasjar pluss ein tilbaketrekt.

– Den strategiske avgjersla kommunestyret tar om at det skal byggast høgare hus i Os, utløyser krav om beredskap i andre enden. Forskriftene seier at vi skal ha utstyr som gjer at vi kan handtera situasjonar i tråd med den risikoen området vårt har, at det står i samsvar.

Kan få 5,6 millionar kroner

I kommunestyret tysdag la rådmannen fram sitt forslag til budsjett. Der vil han gje 5,6 millionar kroner nettopp til utstyr til høgdebruk for brannvesenet.

– Det er veldig gledeleg, og dette håper eg politikarane går inn for.

– Kva type utstyr er det som står på ønskelista?

– Voss og Stord har eldre bilar med lift på 23 meter, Statoil på Mongstad har ein på 52 meter.

– Det som er meir vanleg, som vi ser på, er lift på 32 meter.

Risiko å stå utan

Brannvesenet har god rekkevidde på sløkkeutstyr, men ser det likevel som ei utfordring om det skulle byrja å brenna i taka på dei høgaste husa i Os, anten det er Kysthospitalet i Hagavik, Solstrand Hotel og Bad eller Os Sjøfront.

– Brann i tak, særleg i samband med skifte av tak og jobbing med taktekking, er ikkje uvanleg. Men det kan vera utfordrande å sløkka, særleg om du må stå på avstand. Og endå meir utfordrande å driva redningsarbeid, om du ikkje når heilt opp.

– Byggforskrifta TEK 10 regulerer at ein kan bygga høgare bygg enn 3-4 etasjar med berre eitt trapperom, så lenge brannvesenet har høgdekapasitet til å kjøla ytterveggane der rømningsvegen er.

– Men du veit aldri kva du kjem til når det brenn og redning kan bli ei ekstra stor utfordring om det skulle brenna i høgda, og vi står der med ein stige som berre rekk opp til kanten på 4. etasje.

På plass til sommaren?

Os brann- og redningsteneste har frå før tre store bilar, to mannskapsbilar, (den nyaste frå 2006, den eldste nærmare 20 år) og éin tankbil (ny i 2011).

– Får lift-bilen fleire funksjonar, at den også er kombinert mannskapsbil eller tankbil?

– Nei, den har ikkje eigen tank og den har berre plass til to, det er liften som verktøy som er viktig på desse bilane.

– Liften har plattform til å utføra personredning av 5 personar og kapasitet til å driva brannsløkking frå høgda og i vanskelege tilgjengelege plassar.

– Kor raskt kan den vera på plass i stasjonen?

– Om budsjettposten står seg og blir vedtatt før jul vil det nok gå minst seks månadar frå bestilling til den er operativ.

Fleirbruk for kommunen

At Os brannvesen får ny bil er ikkje berre ein utgiftspost, teknisk eining kan spara store pengebeløp på fleirbruk av liften.

Kommunen har ansvar for veglys på både kommunal vel og fylkesveg, og bruker rundt 1,2 millionar kroner i året på å skifta lyspærer. Rett nok er lyspærene inkludert i beløpet, og må kjøpast også om Os brannvesen si komande investering skal løfta montørar i høgda, men her er det likevel store pengar å spara.

– Vi har sjekka opp og du treng ikkje vera utdanna i elektrikarfaget for å skifta lyspærer på veglys. Du må ha nødvendig opplæring, men med mindre heile armaturen skal skiftast så kan vi ta jobben sjølv.

– Liften kan også brukast til andre tekniske oppgåver i kommunen og vi er naturlegvis interessert i at liften ikkje berre skal bli eit flott utstyr som står klart i tilfelle brann, men at den blir mest mogleg brukt.

Får éi ekstra stilling

I budsjettframlegget frå rådmann Knut Terje Rekve ligg også forslag om éi ekstra stilling i Os brannvesen.

– Dette er ikkje i samband med høgdeberedskap, men ei lovpålagt auke. Med Os kommune sin storleik skal vi ha nok mannskap til også få ut tankbil eller anna støtte i oppstarten av ei brann.

– Stillinga inngår også i det brannførebyggand arbeidet i kommunen.

Eit anna element å ta med når det kjem til dette med bemanning, er funksjon og pensjon. Om dei i leiinga blir brukt operativt, må dei nemleg pensjonera seg når dei fyller 60 år. Har dei utelukkande ein leiarfunksjon kan brannvesenet derimot bruka kompetansen deira i fem år til.

– Derfor må vi sjå til å ha nok operativt mannskap, med sertifikat til å kjøra stor bil, for å få ut utstyret. Dette med funksjon og pensjon gjeld alle i leiinga, med unntak av underteikna. Brannsjefen kan brukast til alt, seier Stein Gjøsund med eit smil.