Brann i Borgavegen
Ein garasje i Borgavegen sto måndag morgon i full fyr.
Bildeserie:
Måndag i 8.15-tida rykte brannvesen og politi ut på melding om brann i ein stor garasje i Borgavegen.
– Då det er bustadhus i nærleiken blei det slått full alarm, fortel brannsjef Stein Gjøsund.
– Vinden har retning mot bustaden, men vindstyrken er svak og avstanden ganske stor, så vi såg det aldri som risiko for at brannen ville spre seg.
Naboar varsla
Det var ingen personar i eller ved garasjen då den byrja å brenna. Rutinemessig ved røykdykkaroperasjonar blir også ambulansen med ut, som backup for dykkarane.
– Ingen personar blei skadd i brannen, opplyser politioverbetjent Audun Hadler-Olsen.
Det skal ha vore naboar som varsla om brannen, og som varsla huseigar, som var heime.
Klokka 9.10 var det framleis sløkkearbeid på staden.
Borgavegen var stengt for trafikk i over ein time mens sløkkearbeidet heldt på.