Bordet fanga

Då Plan- og bygningsutvalet skulle handsama utvidinga av Baronsgården på sist møte valde dei å utsetta saka for å få ei befaring og forklaring på korleis bygget ville bli mot Landboden.

Les òg: Skeptiske til Barongården-utviding

Fredag stilte Os Bygg og Eigedom (OBEAS) mannsterke opp for å presentere planane for utvalet. Tilstades var òg Rolf Bjørø som talsmann for naboane på motsatt side av vegen.

Toget gjekk i 2010

Under befaringa kom det fram at dei endringane OBEAS ønskja var innanfor rammeløyvet kommunen gav dei førre utbyggarane i 2010, og som framleis gjeld.

– Fleirtalet gav rammeløyve i 2010. Det er kvalitetssikra at rammeløyvet mot Landboden er det same som tidlegare.

– Det er no tidspunktet er for å seie korleis vi vil ha det i Os sentrum. Det er no vi har moglegheiten. Kan vi gjera noko med rammeløyvet, undra Terje Sperrevik (TvS).

– Rammeløyvet er gitt. De kan ikkje gå tilbake på det.

– Seier de nei i dag, kan utbyggarane byrja å bygge i morgon etter dei gamle planane om det er det dei ønskjer, forklarte Aina Tjosås, plan- og utviklingssjef i Os kommune.

Frykter smal gate

Harald Døsen (Ap) var ikkje mykje nøgd med svaret frå administrasjonen.

– Det vil seie at utbygginga vi får mot Landboden kan gjennomførast. Eg synest ikkje det er greitt.

– Øvste etasjen er ikkje trekt tilbake, balkongane er ikkje gode nok. Eg tykkjer rett og slett ikkje sida mot Landboden er god nok når vi tenkjer på naboane og vidare oppover gata.

– Når eg ser kva eg var med på å vedta med rammeløyvet, så vil eg beklaga det, no når eg ser resultatet, sa Døsen, som frykta utbygginga av Barongården ville bli førande får resten av Landboden.

Kva med nabotomta?

Nabotomta, mot elva, er i moglegheitsstudien for Osøyro, tenkt som ein park, men også der er det godkjent regulering av næringsbygg med leilegheiter.

– Burde vi ikkje omregulera tomta til parkering, slik at vi er trygge på at det ikkje kjem bygg der òg. Så kan vi heller omregulera til park seinare, påpeika Sperrevik.

– Om OBEAS sel tomta, så har dei ikkje parkeringsplasser, då må dei løyse det på anna vis.

– Dette prosjektet kjem før Liv på Øyro-prosjekta. Kommunen vil ha tomta til park, men det skal vi ikkje løysa no. Det må vi komma i dialog med dei og finna løysing på.

– Kommunestyret har sagt at de vil følgje moglegheitsstudien. Eg kan aldri tru at kommunestyret vil tillatte eit bygg der. Vedtaket i samband med moglegheitsstudien har lagt føringar for at det skal vera parkområde, svara Tjosås.

Fleirtalet med Høgre og Frp gjorde at Plan- og bygningsutvalet godtok dei nye planane for Barongården.