Bondepikene går mørkt og tungt

Det er ein yr gjeng med Tilslørte bondepiker Midtsiden møter i musikkrommet på Søfteland skule måndag kveld.

Dei er nemleg i gang med å øva inn songen «Daylight» av Enslaved som dei skal vera med å synga når det progressive ekstrem metal-bandet feriar seg sjølv med 25 årsjubileumskonsert på USF Verftet.

– Det blir ei ære å stå på scena saman med så dyktige musikarar som gutane i Enslaved, seier dirigent Kristine Bjånes.

Krevande takt-skifter

Det er ikkje ei heilt enkel oppgåve dei har tatt på seg.

– Det blir kjempegøy. Vi gler oss noko enormt, men det er ikkje berre berre. Ikkje minst er det krevande taktmessig. Dei skiftar jo rytme og takt heile tida. Det er ikkje mange andre låter vi har gjort i 15/8-dels takt, ler damene.

Men at dei skal klare det er dei ikkje i tvil om. Og for journalistens utrente øyre låter det allereie ganske bra.

Blei stor stemning

Historia bak det uvanlege samarbeidet er at Enslaved, som det siste året har vore ein del av Rikskonsertane med turné på skular rundt i landet, hadde lyst til å ha med seg eit kor på 10-12 damer på jubileumskonserten.

– Ein kamerat tipsa oss og vi fann ut at kvifor ikkje, vi kunne jo alltids melda oss. Etter at vi hadde sendt dei ein e-post gjekk det ei lita stund. Vi trudde ikkje vi kom til å bli vald ut. Dei hadde fått fleire henvendelsar, men plutseleg kom svaret. Vi skulle synge med Enslaved.

– Du kan tru det blei stor stemning i koret, smiler Bjånes.

– Er ikkje dei satanister?

Reaksjonane i heimen til dei 10 songarane varierte då dei kom heim og satte på Enslaved for å øva på eigenhand. Frå skeptiske foreldre til entusiastiske ungar.

– Ja, kva sa dei heime når de kom og fortalde at de skulle synga med Enslaved og satte på musikken?

– Hæ?? Seriøst????

– Ungane mine tykkjer det er kjempetøft og har lyst til å vera med.

– Hos meg fekk eg spørsmålet - Men, mamma er ikkje dei satanister? Eg måtte forklara at det var dei ikkje, men at dei speler litt anna musikk enn det vi pleier å synga i koret.

– Mine blei litt skremt i starten. Dei tykkja det låt skummelt, men no er det heilt greitt.

Vil læra å growle

Før konserten reknar dei med å få to gjennomkøyringar med bandet i samband med lydprøvene.

– I tillegg håper vi jo at dei kan læra oss litt teknikker og kanskje få litt backstage-opplæring i korleis growle, seier dirigenten som ikkje vil la sjansen gå frå seg til å ta koret eit steg vidare.

Stort spenn

Konserten med Enslaved laurdag er nesten som oppvarming å rekna. Fredag 15. april står dei nemleg i foajeen på Oseana med sin eigen konsert.

– Kanskje vi skulle ta med Daylight på reportoaret, seier Kristine Bjånes.

– Vi får sjå. ein ting er i allefall sikkert. Vi får vist fleksibilitet når vi hoppar ut og inn av forskjellige sjangar. Det liker vi. Førre laurdag sang vi i ein 70 årsdag, no skal vi stå på scenen med Enslaved. Det er store kontrastar, konstanterar dei.