Bokhausten er i gang

- Vi er så vidt i gang med bokhausten, men merkar allereie at salet av bøker byrjar å ta seg opp, seier Merete Johnsen Bjørkeli, butikksjef hos Osøyro Libris.

Lokal forfatter på topp

Det er mykje spanande bøker på veg ut i butikkane før jul, nokre er allereie komen.

- Boksalet er alltid høgare om hausten, nokre av grunnane kan vera julegåver, men òg at det er mykje meir omtale kring bokutgjevingar i media, fortel Bjørkeli.

- Alle snakkar jo om bokhausten.

På Osøyro Libris har dei ei eiga topp 10 liste over mest selte bøker. Der toppar Leiv Bakketeig med boka Humor på blå resept.

Andre bøker frå lokale forfattarar som er ute no er Detektiv Snok av Frode Sirevåg og Kald kaffi sauen av Vidar Bratlund-Mæland.

(Sjå bestselgarlista nederst i saka)

Salig blanding

Av nye bøker frå norske og internasjonale forfattarar trekkjer Bjørkeli fram Jon Michelet si andre bok i En sjøens helt, Cecilie Enger si bok Mors gaver, Jan Guillou si tredje bok i serien Det store århundret som bøker ho trur kjem til å selga godt.

- Og så har vi jo nobelprisvinnaren Alice Munro sine bøker, då ho vann forsvant alle bøkene frå butikkhyllene, og det har vore tomt på forlaget.

- Men no held dei på å få trykkja dei opp igjen.

Leseglade born

Dei litt eldre borna, ungdomane, er ikkje dei som vitjar bokhandlaren oftast.

- Det er nokre som kjem innom, og det går mykje i Fantasy-sjangaren.

- Men vi merkar at fleire, både unge og vaksne, handlar i nettbutikkar og brukar lesebrett, fortel Bjørkeli.

For yngre born går ofte bøker igjen i mange år, og klassikarane held seg sterkt. Men òg nyare bøker som Jo Nesbø sin serie om Doktor Proktor, Jeff Kinney sin En pingles dagbok-serie og Kaptein Supertruse serien skriven av Dav Pilkey er populære.

- No er det òg komen ein ny serie meir retta mot jenter, ein slags jenteutgåve av En pingles dagbok, Dustedagboka av Tomas Espedal.

I tillegg er Gangsterbestemor, bok nummer to av "nye Roald Dahl" David Williams sin barnebokserie klar for hausten.

- Det kjem mykje spanande lesestoff framover og det er i november boksalet tar seg skikkeleg opp, avsluttar Bjørkeli.

Topp 10 Osøyro Libris (f.o.m 01.08):

1. Humor på blå resept - Leiv Bakketeig
2. Pondus 12 - Den 12. mann - Frode Øverli
3. Og fjellene ga gjenlyd - Khaled Hosseini
4. De usynlige - Roy Jacobsen
5. En sjøens helt: Skytteren - Jon Michelet
6. Politi - Jo Nesbø
7. Hulemannen - Jørn Lier Horst
8. Kaffe med musikk - Holmqvist
9. Detektiv Snok - Frode Sirevåg
10. Fuglesang - Svensson

Topp 10 Libris (heile landet):

1. En sjøens helt: Skytteren - Jon Michelet
2. Et helt halvt år - Jojo Moyes
3. De usynlige - Roy Jacobsen
4. Hulemannen - Jørn Lier Horst
5. Politi - Jo Nesbø
6. Og fjellene ga gjenlyd - Khaled Hosseini
7. Mors gaver - Cecilie Enger
8. Hevneren - Jan Erik Fjell
9. Disse øyeblikk - Herbjørg Wassmo
10. Ond sirkel - Wilbur Smith