Blokkerer ladepunkt
– Eg er avhengig av desse ladepunkta, men fleire gjev blaffen og parkerer akkurat der det passar dei, seier ein irritert elbil-eigar.
I helga har ein elbil-eigar i Os hatt problem med å få "drivstoff" fleire plassar i bygda.
– Vi har parkeringsplass eit stykke frå bustaden vår, så det er litt styr om vi skal lada heime. Dessverre er ladepunkta i Os ofte blokkert av vanlege bilar som har parkert ulovleg, fortel ein innringar til Midtsiden.
På Halhjem har det nye ladepunktet, som ifølgje elbil-eigaren er nesten 10 gongar meir effektivt enn dei andre ladepunkta i bygda, ofte vore blokkert av pendlarar.
Blir meldt til politiet
– Eg fann namnet på bileigar og ringte for å be vedkomande flytta bilen sin, men dei som brukte bilen var på Tysnesfest og det var lenge til ho kom til Halhjem.
– Eg forstår at det er få plassar når det er festival, men dette skjer også elles i året. Punktet på Halhjem er ekstra viktig for oss som bruker elbil. Her kan vi toppa batteriet på under ein time, andre plassar tar det gjerne nesten 10 timar.
Elbil-eigaren fann også ein feilparkert bil på ladepunktet på Amfisenteret og seier han vil melda begge til politiet.
– Så får eg håpa dei får ein lærepenge – og at folk blir flinkare til å ta omsyn, ikkje berre for min eigen del, men for alle som har elbil. Dette tilsvarar å sperra av ein bensinstasjon, det håper eg folk forstår.
Kraftig vekst
I 2012 blei det selt over 4000 elbilar i Noreg, noko som er ei dobling i forhold til 2011, skriv ge.no.
I april 2013 var det, ifølgje gronnbil.no, 12.000 ladbare bilar i Noreg.