Blodig førebuing til Langedalen Opp
To veker før årets løp i Langedalen, på veg opp Skåla, gjekk det gale for Andreas Søfteland.
Bildeserie:
Han hadde plan om å løpa sjølv, Andreas Søfteland, som fleire år har vore på dugnad for Søfteland TIL for å arrangera Langedalen Opp.
– Formen er fin og Erik Tysse har saman med Tormod Søreide tatt hovudansvar for arrangementet, seier løparen frå Opptur Motbakkeklubb.
Årets Langedalen Opp, det sjette i rekkja, går søndag 10. september, både for mosjonistar frå Joker og opp, og for konkurranseløparar frå Vinddalsvatnet.
• Sjå resultat og bildeserie frå Langedalen Opp 2016
Løpet hadde 180 deltakarar i fjor (rekorden er 203). Andreas blir ikkje blant deltakarane i år.
På krykker etter Skåla Opp
Årsaka til at Andreas no må stå over er ein skade han fekk i Skåla Opp, eit løp der fleire venar frå Opptur gjorde det bra, men der han sjølv bokstavleg talt gjekk på trynet.
– Litt over halvvegs, på det einaste partiet der løypa flatar litt ut, sette eg opp farten. Så ramla eg, fortel Andreas.
Full i adrenalin reiste han seg opp igjen, men smertene var så store at han trudde foten hadde knekt, så han gav opp. I staden gjekk han ned halve løypa og blei tatt til legevakt for å sy.
– Det var ikkje så mange sting, mesteparten var rens av store skrubbsår. Legen var ikkje nøgd med at eg hadde gått ned, i staden for å få helikopter, den spaserturen gjorde rehabiliteringsperioden lengre og vondare.
– Det som var ekstra dumt med skaden var at eg låg an til ny pers i Skåla Opp. Alle dei tidlegare fire gongane har eg hatt ganske lik tid, denne gong låg eg endeleg eit godt stykke framfor.
Mosjon og elite
Søfteland fekk ei veke på krykker, men er no klar for å hjelpa arrangørane med Langedalen Opp.
– Eg blir dessverre tilskodar i år òg, men eg gler meg likevel.
– At Langedalen Opp både samlar så mange gode løparar, og samtidig har endå fleire familiar, foreldre med barnevogn og andre mosjonistar, er med på å skapa ekstra god stemning i og rundt løype og startområde.