Blir dobbelt så stor

MX Sport flytter to hakk nord i første etasje i AMFI Os og aukar storleiken på butikken frå 500 til 900 kvadratmeter når dei i november har nyopning. I det nye lokalet kjem ein 130 kvadratmeter stor Skogstad-avdeling, Vestlandets første Skogstad konseptbutikk.

- Vanlegvis kjem slike «brand store» i svært sentrale lokale i storbyar, at vi får ein Skogstad shop her på AMFI Os synes eg er veldig spennande, seier senterleiar Anne Kristine Tøsdal.

- Dette vil nok, saman med auka storleik på den populære MX Sport-butikken, bli eit trekkplaster for senteret, trur ho.

Heile sortimentet
I det nye lokalet kjem større sykkelverkstad, eige «trykkeri» for drakter og sponsorlogoar, romsleg pauserom og garderobe med dusj. Men viktigast er den nesten 1000 kvadratmeter store salsflata, leiinga i MX Sport ser fram til å få visa endå større delar av utvalet frå leverandørane deira.

- For det første blir det fint å tilby heile sortimentet til Skogstad, frå kåper til kvinner, tøffe fritidsjakker til menn og støvlar, som dei snart kjem med. For det andre får vi no også endå større plass til andre merker og varegrupper, seier butikksjef Lars Petter Grønvigh.

Bergans kjem til å koma med eigen, stor utstilling, sko får meir hylleplass, Skigutane, som blant anna har merka Bula, Kari Traa, Åsnes, Linken og Extrem, blir også meir synleg i det nye lokalet.

- Men det er ikkje berre på tekstil vi kjem til å bli betre, dei andre satsingsområda våre, innan ski, sykkel, friluftsliv og heimetrening får vi også vist større deler av utvalet enn før.

Kunnskap viktigare enn areal
MX Sport har allereie bemanna opp til den nesten dobbelt så store butikken. Dei 12 tilsette, rundt 6-7 årsverk, har god erfaring med varene dei sel.

- Det er ikkje berre storleik og gode prisar som tel, kundane er ofte kresne og kunnskapsrike. Då ventar dei også å ha ein god samtalepartnar når dei skal handla, seier Jan Frode Skeie.

Jan Frode, broren Tor André og faren Johan er blant eigarane i MX Sport Bergen Holding AS, som eig MX Sport-butikkane Os, Laguneparken, Åsane og Bergen sentrum.

- For ei tid tilbake valte vi å satsa på desse store varekategoriane, både når det gjeld utval og opplæring. Dei rundt 80 tilsette i desse fire butikkane er alle saman til fjells kvart år for grundig test av årets skimodellar. Om våren er vi på telltur og har teoretisk og praktisk test av alt frå primus og sovepose til sykkel og fiskeutstyr.

- Vi har hatt både dykkerutstyr og golfutstyr i butikken tidlegare, men du kan ikkje vera god på alt.

- Så storleik betyr ikkje alt?

- Nei. I Laguneparken har vi hatt vekst etter at XXL flytta inn i nabolokalet, vi skårer nok på kompetansen vår, samstundes som vi har eit godt forhold til leverandørane våre og derfor kan gje gode prisar på varer av høg kvalitet.

Overtar etter Coop
Tysdag blei Amfi Eiendom sin reguleringsplan for AMFI Os godkjent. Arbeidet med å utvida senteret med rundt 2500 kvadratmeter startar etter at julehandelen er over, altså i starten av 2011.

Men innandørs har det allereie byrja å skje ting. Coop Prix stengte i slutten av august og kjem tilbake som 2000 kvadratmeter stor Coop Extra når tilbygget er ferdig, på forsommaren neste år.

MX Sport overtar lokalet Coop Prix flytta ut av medan deira gamle lokale blir ståande ledig for ein eller fleire nye leigetakarar i senteret.

- KID blir verande der dei er, men vi må flytta litt på Fjord´n Blomster. Tilkomsten til det nye tilbygget og Coop Extra blir i den delen av bygget der deira lokale er, fortel Tøsdal.

Senterleiaren fortel at dei er i dialog med fleire potensielle nye legetakarar, men kan førebels ikkje seia noko om kva butikkar som er på veg til AMFI Os.