Blei terga av sønene - fekk løn for kjeldesorteringa

– Eg har inntrykk av at det er mange som ikkje veit at Returkartonglotteriet framleis er der, seier Tina Skudal hos Bir.

Det er kanskje ikkje rart, du skal leita litt rundt på Bir.no for å finna denne informasjonen om lotteriet.

– Men det blir kvart år delt ut 1,6 millionar kroner i dette lotteriet.

Kvart kvartal blir kartongar som er trekte ut lokalt trekt ut på nytt. Då får éin vinnar heile 100.000 kroner, 30 andre får 10.000 kroner kvar.

– Dette er premie nummer 39 eg har vore med på i vår region sidan 2007. Det er ikkje lenge sidan det var to andre i Os som vann 10.000 kroner kvar, seier Skudal.

Denne gong var det Vibeke Halhjem som, etter mange år med systematisk bretting først gjekk gjennom det lokale nålauget, og så fekk seg ein premie.

Hadde lite tru på gevinst til mor

Vibeke fortel at ho ser fleire fordelar med å sortera avfall, utover miljøomsynet.

– Vi sorterer plast, papir og mat, og har naturlegvis ein eigen kasse til batteri. Det er plassbesparande og økonomisk, restavfallet vårt blir berre henta éin gong i månaden.

– I tillegg vi med kompostering, men det er det Magnar som tar seg av.

Ektemannen, som tidlegare var kjøpmann i Os sentrum, er glad for at Vibeke endeleg vann.

– Nokre av gutane våre har jo mobba Vibeke litt mens ho har halde på med denne sorteringa, dette blei ein fin revansje, seier Magnar og ler.

Han minnest òg då han på midten av 90-talet, på dugnad for Søre Neset il, var med og køyrde ut plastspann til alle bustadane i Os. Idrettslaget samla inn pengar til den første banen på Bjørnen, i år opna som kjent bane nummer to.

Sånn kan du auka vinnarsjansane

Skudal stilte i dag på Halhjem med premie og blomar. Samtidig gav ho eit tips ho såg Vibeke allereie var klar over.

– Når kartongane blir komprimerte og transporterte så hender det ofte at dei som ligg inni ramlar utav. Når vi skal trekka vinnarar er det faktisk sånn at vi må leita etter kartongar med telefonnummer på.

– Skriv nummeret ditt på alle kartongane! Éin kartong - eitt lodd.

Det er heller ikkje berre mjøkekartongar du kan levera inn.

– Det er kartongar på fleire varer, frå juice og fløyte til vaniljesaus og sjokoladepudding, alt kan leverast i lotteriet.

– Papirfiberet er verdifullt. Papiret blir berre brukt éin gong i direktekontakt med mat, men går gjerne 6-7 gongar som emballasje på for eksempel pizza eller kornblanding, der det er ein innerpose. Etter dette er paprfiberet korta så mykje ned at det blir til serviettar eller tørkerull. Papirfiberet kan ha eit langt liv om folk er flinke å levera det inn.