Blei for stilleståande
Os gjekk i føringa, men blei kontra i seink av BI i toppkamp i Oshallen.
Bildeserie:
Måndag kveld tok Os sitt herrelag imot BI til 13. serierunde (11. kamp for BI).
Før kampstart sto alle dei 5 beste av 10 lag i avdelinga med 3 tap kvar, dermed er det mykje som kan kallast toppkamp i desse dagar. Sånn var det òg med denne.
– Vi spelte uavgjort på bortebane. Då fekk vi dei ned i vårt tempo. Men vi var så dum å seia at vi trener lite, så i dag sprang dei i frå oss, fortviler ein lattermild Isak Røen etter kamp.
Røen skåra 4 av 5 mål då Os auka frå 2-1 til til 6-3, og passerte med 8 mål i kampen, ifølgje eigne notatar, 100 skåringar så langt i sesongen.
– Dessverre varierer vi for mykje i prestasjonar. I første omgang sto vi vårt kanskje sesongbeste i forsvar. Men vi klarte ikkje å unngå det vi helst skal unngå, kontringar imot, seier trenar Alexander Heggø.
Heggø, som plar vera blant toppskårarane, spelte ikkje sjølv i går.
Os gjekk frå å leia 6-3 til å ligga under 7-10. Til pause sto det 13-13.
Så kom kontringane.
Stillinga gjekk frå 14-15 til 15-18 etter tre raske overgangar på rad.
Einar Godø sto ein god førsteomgang, men fekk i overkant mykje å henga fingrane i etter pause.
Både Jørgen Wold (4 mål) og Isak Røen missa frå 7-metersmerket.
Andre målskårarar: Joakim Blostrupmoen (2), Fredrik Andresen (3), Trygve Lerch Dahl (1) og den einaste ungdomaen i troppen, Sondre Midtbø (2). Midtbø sette både det første og det siste målet.
Kampen enda 20-28.