BilXtra på plass i Os
Bremseklossar eller takboks? Vest Bilutstyr AS har opna avdeling i Jordmorsvingen i Os sentrum.
Bildeserie:
I Jordmorsvingen aukar omfanget av bilrelaterte forretningar. Bjoarvik Trafikkskole, Bjoarvik Bil og bilverkstaden Os Auto fekk no i mars selskap av utstyrsbutikken BilXtra.
– Os Auto er med i BilXtra-kjeden og er eit av sju verkstadar i Os som vi supplerer med delar, fortel butikksjef Regine Malkenes.
Malkenes har jobba hos BilXtra andre plassar før ho kom til Os som sjef for butikken som nyleg opna dørene. Med seg i butikken, som er ei avdeling av Vest Bilutstyr AS frå Bergen, har ho tidlegare lastebilsjåfør Even Andersen frå Søfteland.
Med mykje på lager
Vest Bilutstyr har supplert verkstadar i Os med delar i ei årrekkje. Butikken på Os blir ikkje berre for mannen i gata, den har også fått eit lager med bra utval av slitedelar til ulike biltypar.
– Delane er frå kjente fabrikkar, fabrikkar som også lager for merkeverkstadane, og dei lager varer av god kvalitet, seier Regine på vegne av eigne bremseklossar.
Tryggleik, sykkel og stereo
Utanom slitedelar og bilpleieprodukt har BilXtra varegrupper som takboksar og stativ, barnestolar og stereoanlegg.
– Sidan vi no er i Os tenkte vi at vi også skulle satsa litt på båtpleie og båtutstyr, seier Andersen.
Besøk før opning
Andersen fortel om travle tider med innreiing av den cirka 130 kvadratmeter store butikken på Os, og mange nysgjerrige på døra i innspurten.
– Vi hadde 2-3 for dagen som svingte innom og ville handla. Dessverre måtte vi be dei venta nokre dagar til alt var på plass.