Biljakt og knekt lyktestolpe
Politiet var i natt innom vanskelege nattklubbgjestar, lyktestolpe som sperra veg og ein bil som ikkje ville stoppa.
I 4-tida natt til søndag ville politiet stoppa ein bil dei møtte på, men føraren hadde ikkje plan om å stoppa.
– Bilen kjørte vidare og farten auka, fortel operasjonsleiar i Hordaland politidistrikt, Gustav Landro.
Bilen kjørte mot Bergen, og sjølv om patruljar i Fana var varsla kom bilen seg unna.
– Patruljen mista kontakt med bilen rundt Vallaheiane. Men dei kjenner bilen og veit kven som er eigar, og eigar har gjort liknande ting før, så saka får nok konsekvensar, trur Landro.
Lyktestolpe knekt - av bil?
Klokka 03.20 natt til søndag fekk politi og brannvesen melding om brann frå knekt lyktestolpe i Torkjelsvegen på Søre Neset.
– Det var litt gneistrar, men ikkje brann, fortel Terje Håvardstun frå Os brannvesen.
– Dei som bur ved stolpen var ute med både varselstrekant og vestar på, så ingen skulle kjøra i stolpen. Den låg nemleg tvers over vegen.
Det er uvisst kva som har gjort at stolpen knekte.
– Men det må nesten vera ein bil, ein stolpe knekk ikkje av seg sjølv. Naboane hadde dessutan høyrt nokre lydar før stolpen gjekk i bakken.
BKK kom til staden og fekk saman med brannvesenet løfta stolpen opp i ståande, godt nok til at dei fleste kjem seg under den fram til ny stolpe er på plass.
Vist vekk frå sentrum
Klokka 00.50 natt til søndag fekk politiet melding om ein rusa gjest utanfor ein nattklubb. Vedkomande hadde vore i bråk med ein annan gjest og fekk av politiet pålegg om å fjerna seg frå Os sentrum.
Klokka 02.30 ringte ein annan gjest til politiet, ein som ikkje var nøgd med å bli avvist på ein nattlubb.
– Han var rusa og fekk også pålegg om å fjerna seg frå sentrum, seier Landro.