Bil kolliderte med syklistar
To syklistar blei køyrd til sjukehus etter ei trafikkulykke på E39 Byvegen (oppdatert).
Torsdag i 19-tida kom det melding om trafikkulykke mellom bil og syklistar på E39 Byvegen ved Ulvenskiftet.
Både ambulansar, brannvesen og politi rykte ut.
– Ingen er alvorleg skadd, men to syklistar er køyrd til Haukeland i ambulanse, melder politiet på Twitter.
Bilførar er meldt og politiet har tatt beslag i førarkortet til vedkomande. Midtsiden kjenner ikkje til kor dei skadde kjem frå, men fleire av syklistane i følgjet hadde Bergen CK-drakter på.
Det var manuell dirigering på E39 mens nødetatane var på staden.
Oppdatert: Samtykka ikkje i beslag
Politiet fortel fredag at ulykka skjedde i samband med ei forbikøyring.
– Det skal ha vore ei gruppe på 50 syklistar som trente i lag. Desse var noko spreidd langs Byvegen, og då bilisten køyrde forbi ei av puljene så kom han borti to av syklistane, fortel politioverbetjent Audun Hadler-Olsen.
Slik han les ut frå rapporten skjedde ulykka på E39 ved Ulvenskiftet, ikkje i sjølve krysset.
Bilførar, ein mann i 60-åra frå Bergen, samtykka ikkje i førarkortbeslaget.
– To personar blei skadd og vi har oppretta sak, så får vi sjå kva etterforskinga og vitneavhøyr seier om det som skjedde.