– Beste kamp til no i år
Lysekloster har framleis ikkje tatt poeng i 2. divisjon, men har litt å gleda seg over etter dagens bortekamp mot Sola.
Laurdag spelte Lysekloster sin første kamp i Rogaland.
Kampen gjekk mot Sola, som landa på 5. plass i 2. divisjon i fjor, og som har starta årets serie med to uavgjorte (Frigg og Førde).
Sola - Lysekloster 2-1 (1-0)
Målskårar, Lysekloster: Espen Birkeland
Lysekloster: Chris Sunde Midtun - Ola Sjømæling, Gojko Ivkovic, Denis Ljubovic, Aleksander Andersen (Joakim Hjelmeland)- Espen Birkeland (Martin Eidsvik), Baste Jonassen, Hans-Christian Nysæther - Thomas Helland, Tommy Gaustad (Ken-Joar Føyen) og Christer Bergesen Olsen.
– Vi spelte veldig bra i store delar av kampen. Vi skaper sjansar og vi pressar, vi gjekk til pause med friskt mot i dag, seier trenar Thomas Sandal.
Espen Birkeland utlikna på frispark i andre omgang.
– Han løfta ballen over muren og rett i kryssen, det kan ikkje gjerast så mykje betre enn det, meiner Sandal.
Han ergrar seg samtidig over at det ikkje blei poeng i dag heller.
– Vi har nokre småting vi må bli betre på, men dette var eit kjempeløft frå førre runde og spelemessig det beste vi har gjort i år.
Tar imot Åsane på onsdag
Stord slo Fyllingsdalen 2-1, Fana slo Lørenskog 2-0 og Nest-Sotra slo Vard Haugesund 2-1 i dag.
Lysekloster tar imot Åsane frå OBOS-ligaen til andre runde i NM onsdag.
Neste laurdag er det heimekamp i serien, då mot Vålerenga 2.