Barnehagejubel på Nore Neset
Dei kjøpte tomta i 2009. I dag var det endeleg byggestart for nye Skorvane FUS.
Bildeserie:
– No måtte eg senda bilde til foreldra, seier styrar Kristin Tellefsen ved Skorvane FUS Barnehage på Skeie.
I dag kom den første gravemaskina, våren eller sommaren 2018 skal ny, større barnehage stå klar.
– Vi har heist flagget og gler oss til å flytta inn i ny og større barnehage!
Kjøpte tomta i 2009
I 2009 kjøpte Trygge Barnehager tomt på flaten ved rundkøyringa mellom Nore Neset barneskule og ungdomsskulen, i 2010 overtok dei drifta av den tidlegare kommunale barnehagen på motsett side av vegen, i tillegg til den kommunale avdelinga i Strøno.
Målet var å bygga nytt, men blant anna grunna manglande behov for fleire barnehageplassar i Os kommune, blei det utsett bygging og leige av det kommunale bygget.
• Les òg: Frå 3 til 6 avdelingar på Nore Neset (januar 2017)
Kan bli full frå første dag
I dag har vi tre avdelingar på Nore Neset og éi i Strøno. I alt er det rundt 115 ungar.
På foreldremøte for to veker sidan kom det ein del spørsmål om framtida til avdelinga i Strøno.
– Vi held fram med å driva denne også etter at nybygget er klart, men vi er avhengige av at denne blir fylt opp, at vi har ungar også i denne avdelinga.
Den nye barnehagen skal heite det same etter flytting til meir enn dobbelt så stort bygg.
– Vi har ein del ventelister, og det er litt babyboom på Nore Neset for tida, så det kjem fleire yngre søsken, seier Tellefsen.
Ho reknar med at den nye barnehagen kan bli fylt heilt opp ganske raskt.