Bandbattle over fjorden

Oseana, Os kommune og Os Rockeklubb saknar eit godt ungdomstilbud i kulturhuset. No inviterer dei ungdomsband frå bjørnefjordsregionen til battle 22. september.

- Dette er for ungdomsband. Garasjeband på 35+ kan få halda seg i garasjane denne dagen, smiler kulturhusvert Janne Mari Hjelle.

Kulturhusverten innrømmar at dei så langt ikkje har lukkast med å gjera kulturhuset til ein attraktiv plass også for ungdomen.

- Vi har hatt nokre arrangement, men føler det ikkje har tatt heilt av.

- Då Espen (Hjertaas), som er huset sitt rockealibi, blei tilsett i vår tok eg opp igjen ein tanke eg hadde frå tidlegare om å laga ei bandkonkurranse, både for å la det blomstrande bandmiljøet få visa seg og for å skapa eit rusfritt attraktivt tilbod til ungdom, forklarar Hjelle.

Proff backline

Hjertaas har lang fartstid som lydteknikkar for Immortal og i Os Rockeklubb. Vegen var difor kort til å invitera rockeklubben med på laget.

- Det er så mange gode band både i bygda og i dei andre kommunane rundt fjorden, at dette måtte vi sjølvsagt vera med på, seier Kjetil Osablod Grønvigh i rockeklubben.

Rockeklubben har tatt på seg ansvaret for alt det scenetekniske.

- Vi skal sørgja for at banda får det utstyret dei treng og at det blir proft med lyd og lys, lovar Grønvigh.

For alle sjangrar

The Battle of Bjørnefjord (BOB) er ei bandkonkurranse der vinnaren får vera oppvarmingsband for Anja Elena VIken ("Klæsse deg ned") fredag 5. oktober.

- Det er viktig å presisera at dette er ein bandkonkurranse og ikkje ein songkonkurranse. Difor held det ikkje å ta med seg kassegitaren og si eiga stemme, forklarar Espen Hjertaas.

- Like viktig er det å presisera at det ikkje er krav til sjangrar. Sjølv om rockeklubben er medarrangør er band som speler dansemusikk, pop, metal og andre sjangrar like velkommen som dei som speler rockemusikk, skyter Hjelle inn.

For å melda seg på konkurransen må du senda ein mail til arrangørane innan måndag 13. september.

- Vi oppretter ei eiga side på facebook og på Oseana si heimeside kor all informasjon vil stå, forklarar Hjelle.

For hele Bjørnefjorden

Os kommune ved kultursjef Lisbeth Lunde Axelsen stiller ikkje band, men med midlar og anna støtte.

- Etter at vi fekk musikkbingane på Kuventræ og Søfteland har miljøet fått ei fantastisk oppblomstring. Då initiativet kom var eg ikkje i tvil om at dette var noko vi skulle støtta, smilar Axelsen.

Gjennom dei kommunale kanalane håpar ho kultureininga kan vera med å skape blest om arrangementet også på Fusa, Tysnes, Austevoll, Samnanger og på Stord.

- Ein idé kan jo vera at kommunane bidrar med å sørgja for trygg transport for deltakarar og publikum slik som Fusa gjorde i samband med UKM, seier Grønvigh.

Faglege tilbakemeldingar

Kor mange band som melder seg på og kor mykje publikum er arrangørane usikre på.

- Dette er første gongen så om det kjem tre band eller tredve veit vi ikkje.

- Uansett kan vi lova at dei skal få godt med speletid og support, lovar Hjertaas som fortel at bandbattles, som dette, er svært vanleg på festivalar rundt om i Europa.

- Der går det gjerne battles før festivalane kor dei fire fem beste banda får spele på festivalen.

BOB blir ein konsert med flatt gulv og plass til 1150 tilskodarar i salen. Vinnaren vil bli kåra av publikum og ein fagjury som får 50% av stemmane kvar.

- I tillegg til hovudpremien som er å varma opp for Anja Elena vil det dryssa forskjellege premiar på fleire av deltakarane.

- Kvart einskild band skal få konstruktiv og god tilbakemelding på prestasjonane. Vi håper konkurransa skal vera med på å gje dei inspirasjon og at dei skal bli enno betre, seier Hjertaas.

- Like viktig som å kåra ein vinnar er det å skapa eit miljø for og mellom banda i Bjørnefjordregionen slik at det kan utvikla seg vidare.

- Håpet er jo at vi om fem år har fått til eit arrangement som gjerne strekk seg over fleire dagar og med lokale konkurransar i forkant, avsluttar Janne Mari Hjelle.