Avgjort i siste sekund

Etter 3-0-siger i 64-delsfinalen gjekk Os sitt juniorlag i går vidare i A-sluttspeler i Gothia cup.

I 10-tida i dag starta 32-delsfinalen, som gjekk mot naboklubben Stord.

Styrte kampen

Stord hamna på 2. plass i 1. divisjon i vår, rett nok med fleire frå 1994-årgangen enn kva dei kan ha med i Gothia cup, medan Os sitt lag består nesten utelukkande av førsteårsjuniorar.

– Vi styrte heile første halvdel og pumpa på med angrep og sjansar, seier lagleiar Tore Kleppe.

Men Os klarte ikkje å skåra.

Runda keeper

– Det nærmaste vi var skåring var nok då Sander Kvittingen runda keeper. Men han blei pressa av ein forsvarsspelar og skaut utanfor.

Til pause sto det 0-0, i andre omgang jamna det seg litt meir ut og 0-0 sto seg til 59. minutt.

Då skåra Stord kampens einaste mål.

Vellukka test av Gothia cup

– Det er ein skuffa gjeng eg sit med her, men vi er stolte over dei og synest dei har klart seg bra. I dag viste dei veldig aggressivt spel, dei gjekk ned med flagget til topps, meiner Kleppe.

Os har fått 6 kampar, der dei har vunne 4, med 11-0 som mest suverene siger.

– Nokre blir verande til laurdag, andre pakkar saman og reiser heim. Uansett har vi hatt ein veldig fin tur, ok sportsleg og veldig bra sosialt.