Avdekka sprik i fjor vår

Kommunen har, som barnehagemynde, eit pågande tilsyn med Borgafjell Barnehage etter at Midtsiden avslørte at foreldre og tilsette var uroa for barnehagen.

I tenesteutvalet tysdag fortalde barnehagefagleg rådgjevar Irene Ullensvang at Borgafjell barnehage, som dei 16 andre barnehagane i Os jamnleg blir ført tilsyn med etter barnehagelova.

– Vi gjennomfører seks til åtte tilsyn i året med forskjellige barnehagar, fortalde Ullensvang som i møtet fortalde at den endelege rapporten for det pågåande tilsynet truleg vil vera klar i løpet av ei vekes tid.

– Vi var på tilsyn i Borgafjell også i våren 2017 og det blei skreve ein rapport då. Dei som ønskjer å lesa den kan gå på heimesida vår og sjå. Der ligg rapportane frå alle tilsyna vi har gjennomført siden 2010.

Retta varsel om lovbrot

I den endelege tilsynsrapporten frå 26. mai 2017 kjem det fram at ein i samband med tilsynet gav eit førehandsvarsel om rapport med varsel om lovbrot. På bakgrunn av tilsvar til rapporten blei det sendt ein endeleg rapport, kor kommunen stadfesta at grunnlaget for lovbrotet ikkje lenger var til stades.

Opplevde sprik og variasjonar

Det er barnehageeigar sitt ansvar å sikre at bemanninga til ein kvar tid er forsvarleg og tilstrekkjeleg i høve tal barn og barnehagen si godkjenning.

– Tilsynsteamet har mottatt dokumentasjon som er etterspurt og barnehagen sin vurdering av eigen situasjon er at barnehagen driftar i samsvar med gjeldande lov og regelverk. Tilsynsteamet opplevde sprik og variasjonar i mottatt dokumentasjon og i samtalar med tilsette. Styrar i barnehagen har sendt oss oppklarande oversikter som syner at den pedagogiske bemanninga er innafor lovkrav, heiter det i vurderinga frå kommunen, samstundes skriv dei:

– Tilsette som var ein del av tilsynet refererer tilsynsdagen til høgt sjukefråvær i Borgafjell barnehage. Tilsynsteamet ba styrar om å framlegge tal over sjukefråværet og har mottatt tal frå 1. kvartal 2017.

– Forsvarleg og tilstrekkjeleg bemanning vart grundig drøfta på tilsynsdagen. På bakgrunn av sprikande tilbakemeldingar knytt til bemanning og vikarbruk så er det av interesse for tilsynsteamet å få synleggjort informasjon som er gitt til tilsette og føresette frå eigar si side. Styrar refererer til vikarbruk medan dei tilsette seier at det i periodar har vore restriksjonar knytt til bruk av vikar.

– På bakgrunn av sprikande informasjon knytt til bemanning, sjukefråvær og vikarbruk rådar vi styrar til å skriftleggjere all informasjon og leggje inn faste rutiner som dokumenterer møtepunkt med både tilsette og føresette gjennom året.