Auka fokus på øl
– Trendene endrar seg, også på nattklubb er interessa for øl blitt større, seier Bjarte frå Catten. No arrangerer han ein liten øl-skule med nestor Smith-Gahrsen frå 7 Fjell.
Gahr Smith-Gahrsen, bryggerimeister hos 7 Fjell Bryggeri, kjem til Os og Catten Nightclub.
– Då eg overtok nattklubben var det omtrent 70/30 med sal av fatøl/brennevin. Så snudde det og blei nesten motsett, vodka med RedBull har vore ein bestseljar dei siste åra.
Bjarte Andersen legg ikkje skjul på at han tener meir pengar på sal av brennevin enn øl, men gler seg samtidig over at interessa for øl no aukar.
– Det er god inntening på brennevin, men det blir meir å passa på, det er dei som drikk brennevin som har lettast for å mista hovudet.
– Heldigvis er har vi framleis gjestar som berre er ute på nokre rolege øl, og som har byrja å bli meir interessert i smak og variantar. Vi merker det har skjedd noko her dei siste 6-7 månadane.
Lokale bestseljarar
Ved sidan av Hansa på tapp har Catten hatt blant anna Heineken og Sol på ølmenyen. Hansa sel bra, også i Os, men så testa han ein variant frå eit anna bergensbryggeri, 7 Fjell.
– «Småtøs» har blitt veldig godt mottatt og no vil eg ha inn meir frå 7 Fjell Bryggeri. Då tenkte eg at vi like gjerne kunne laga eit arrangement.
– Januar er ei roleg tid i bransjen, så då passa det ekstra godt å prøva noko nytt.
Første av fleire
Fredag kjem bryggerimeister Gahr Smith-Gahrsen til Catten for å snakka om øl frå 7 Fjell. Smith-Gahrsen har vunne fleire prisar, sete i juryar og ekspertpanel, og er ein erfaren foredragshaldar.
– Det er første gong vi arrangerer noko slikt, så eg er veldig spent.
– Planen er å ha fleire foredrag om øl gjennom året, både når det nærmar seg sommar og når juleølet er i hyllene igjen. Vi har allereie ein del påmeldte til fredag så eg har håp om at dette kan bli ein vellykka kveld, seier Andersen.