Arrangerer støttemarkering for Ukraina
Den Ukrainske Forening i Bjørnafjorden inviterer til støttemarkering for Ukraina.
Laurdag 24. februar er det to år sidan krigen i Ukraina braut ut.
Dei to siste åra har Bjørnafjorden tatt i mot cirka 300 ukrainske flyktningar.
Førstkommande laurdag inviterer Den Ukrainske Forening i Bjørnafjorden kommune, for andre året på rad, til ei støttemarkering for Ukraina.
– Vis solidaritet
Arrangementet er for å visa solidaritet med Ukraina og det ukrainske folket.
Styret oppfordrar folk i Bjørnafjorden til å stilla opp klokka 13 på parkeringsplassen ved Kløvertun i morgon.
Dei oppmøtte skal gå gjennom Os sentrum og bort til Vognhallen.
I Vognhallen vert det framføring av Ukraina sin nasjonalsong, servering av bakst og kaffi, og kulturelt innslag frå Søre Neset musikklag og born frå Ukraina.
Julia Tveit og Pavlo Nevidnychyy skal halda appellar.
– Me håpar at bjørnafjordingane tar med seg venner og kjente, og sluttar opp om arrangementet slik at vi får ei fin og viktig markering, seier Pavlo.
