Årets største utedag blir éin time kortare

Sidan Jada-ballet på 80-talet har første juledag vore den store utedagen i Os, kanskje den største, om vi ser vekk frå enkeltkonsertar og festivalar.

Men grunna ei halv setning «som forsvann» og det at 1. juledag landar på ein søndag, blir festen kortare enn tidlegare år.

– Er dette ein glipp?

Eigar av Catten Nightclub, Bjarte Andersen, seier at han trudde at han hadde nattklubbløyve (skjenking til klokka 3) også natt til helligdagar.

– Då ein gjest kom til meg i helga, og sa at Solsiden hadde fått avslag på søknad om utvida skjenking natt til 26. desember, måtte eg sjekka mine eigne papir, fortel Andersen.

I løyvet frå sommaren 2016 står det at han har lov å skjenka til klokka 3 fredagar og laurdagar.

– I tidlegare løyve sto det ei linje om at dette løyvet også var natt til helligdagar.

Slik var Catten (Irish Cat AS) sitt utvida løyve frå 2010 formulert: «Skjenketider heile veka frå kl. 12.00 til kl. 02.00 og til kl. 03.00 fredag, laurdag og dag før heilagdagar.»

– Denne linja er no vekke, utan at vi har fått varsel om dette. Eg undrast jo om dette er ein glipp, eller om det er ei bevisst endring.

Søkte, men fekk avslag

Solsiden-eigar Tore André Sagstad seier han alltid har hatt skjenking til klokka 3 første juledag, men at han i år var obs på at dagen landa på ein søndag, og at han ikkje automatisk har nattklubbløyve denne dagen.

– Derfor sendte eg søknad på utvida skjenking i starten på november, så kommunen skulle få god tid til å svara, seier Sagstad.

Han hadde ikkje oppdaga at kommunen har behandla søknaden og sendt svar 16. november før Midtsiden tok kontakt for kommentar.

I avslaget står det:

Vi viser til søknad om utviding av skjenketid på søndag 1. juledag 2016 med grunngjeving av at det er ein tradisjon for at dette er ein «utedag» for innbyggjarane og tilreisande på juleferie.

I Os kommune sine retningsliner for sals- og skjenkeløyve heiter det:

Utvida skjenketid: «Skjenkestader kan søkja om utvida skjenketid til kl 0300 ved særlege høve/arrangement. Særlege høve/arrangement kan t.d. væra arrangement knytt til større festivalar, arrangement med ideelt føremål eller spesielle konsertar med nasjonale og internasjonale artistar. Utvida skjenketid kan gjevast for all alkoholhaldig drikke.»

Søknaden din fell ikkje inn under dette og etter ei total vurdering får du difor avslag på søknaden om utvida skjenketid på 1. juledag.

– Klare retningslinjer

Saksbehandlar Signe Eide seier til Midtsiden at ho har halde seg til Os kommune sine retningslinjer vedtatt sommaren 2016, som er ei vidareføring av retningslinjene for 2012-2016.

– Vi har berre desse retningslinjene å gå etter, og kan ikkje sjå at søknaden fell inn under desse, seier Eide.

Ho kan heller ikkje hugsa at ho tidlegare år har gjeve løyve til utvida skjenking første juledag.

– I fjor var jo denne dagen på ein fredag, og då hadde dei løyve til klokka 3. Kva dei har gjort i 2014 veit eg ikkje, men eg meiner vi ikkje har gjeve løyve til dette tidlegare heller.

– Retningslinjene har vore ute hos blant andre utestadane, for uttale, og om dei har innspel så er det viktig at dei kjem med det før vedtak blir fatta, legg ho til.

– Mister nesten halve kvelden

Både Catten og Solsiden opplever at osingane kjem ut på nattklubbane først i 00.30-tida, og at det går nesten ein time før det byrjar å bli fullt hus.

– Eg reagerer på at dei berre tar vekk ei linje frå tidlegare løyve utan å varsla oss. Det var eit slumpetreff at eg oppdaga at eg ikkje lenger har utvida løyve natt til helligdag, seier Andersen.

– Den siste timen er den klart viktigaste. At vi skal mista denne, på det som kanskje er den beste kvelden vår heile året, er uforståeleg. Dette ser ut til å vera på tvers med alt som handlar om Os inspirerer og Liv på Øyro, når ikkje det er ein god grunn til å seia nei, så skal dei vel seia ja, seier Sagstad, som har plan om å følgja opp saka.

Bjarte og Tore André førebur samtidig osingane på at dei truleg bør koma seg frå vorspiel og ut på livet litt tidlegare enn vanleg, om dei vil ha seg nokre timar i baren.