Årets kull kom tidleg
Seks dagar tidlegare enn i fjor var det i dag klekking i reiret til knoppsvanene i Oselvo. Den første ungen trilla ut av reiret.
Bildeserie:
Både i 2012 og 2013 (sjå bildeserie og video) var det klekking 25. mai hos herr og fru Hamnesjefen, knoppsvaneparet som i år, for fjerde år på rad, hekkar i Oselvo ved Finnebrekka.
I år kom våren tidleg, det gjorde også svaneungane.
– Fram med kikkerten
– Vi såg at begge svanene i dag var i reiret, at dei reiste seg opp og la seg ned igjen, at dei løfta mykje på vengene og strekte hals.
– Då var det fram med kikkerten, og der såg vi første ungen, seier Annelise O. Tumyr, ein av naboane til reiret.
Trilla ut av reiret
Då Midtsiden i ettermiddag var i Finnebrekka for å prøva å ta bilde av dei første svaneungane i årets kull, gjekk det eit kvarter før ein av dei tassa ut frå vengjene til mora og faren.
Så gjekk den to steg for langt, og trilla ut av reiret.
Foreldra reiste seg og tok ei opptelling, men ungen måtte klara seg sjølv.
Etter nokre intervalløkter var han oppe i reiret igjen.
Berre tre ungar?
I fjor fekk knoppsvaneparet åtte ungar, året før la dei også åtte egg, men berre sju blei klekt.
Då svaneparet i dag reiste seg såg vi berre éin unge og eitt egg, utanom den eine som trilla ut av reiret.
Men om ein dag eller to ser vi nok familien på symjetur i Oselvo, og då blir ungane lettare å telja.