Årets ildsjel: Brit Eirin Tungeland
Også Mol og Sørum fekk pris på idrettsgallaen i kveld.
Bildeserie:
Brit Eirin Tungeland frå Os Turn si handballgruppe var blant over 500 nominerte til prisen «årets ildsjel».
Juryen valte først ut éin frå kvart fylke, så blei det funne fem finalistar:
Brit Eirin Tungeland frå Os Turneforening i Hordaland.
Vivian Nilsen frå Berlevåg Turn & Idrettsforening i Finnmark.
Sverre Inge Lystrup Ness frå Hommelvik Guts i Trøndelag.
Rolf Hansen frå Galterud IF i Hedmark.
Karin og Kåre Ivar Melsæther frå Bærums Verk Hauger IF i Akershus.
Då kveldens niande pris skulle delast ut, var det eldsjelene sin tur.
Prisen gjekk til Brit Eirin Tungeland!
– Tusen takk! Dette er heilt uverkeleg! sa Brit Eirin.
– Det er mange eg vil takka, heldt ho fram.
Prisen blei delt ut av Marit Bjørgen og Kjetil André Aamodt.
Takka ektemann, barnebarn og andre frivillige
Prisvinnaren stilte utan manus, men hugsa både dei som nominerte ho, andre frivillige ho har jobba med som frivillig, alle som har stemt ho fram og jobba med å få andre til å stemma. Og spelarane ho har trent og trent med.
– Så har vi dei eg kanskje vil takka mest, HU-laga eg har fått trena.Dei har vist mykje idrettsglede og gitt meg mykje glede.
– Og så må eg få takka barnebarna mine, Tormod, Peder og Halvor, for at eg har fått lov å vera trenaren deira. Det har gjort at eg kan halda fram endå litt til, sa Brit, før ho takka ektemannen Thorleif, som lar ho gå så mykje i hallen.
2 av 3 prisar til Bjørnafjorden-utøvarar
Tidlegare i kveld har årets lag blitt kåra.
Her stakk Anders Mol frå Strandvik saman med Christian Sandlie Sørum av med prisen.
Trenaren deira, Kåre Mol, var nominert til prisen årets trenar, men den gjekk til Leif Olav Alnes.
Alle prisvinnarane
Årets gjennombrot: Erling Braut Haaland
Årets kvinnelige utøver: Therese Johaug
Årets trener: Leif Olav Alnes (Karsten Warholm sin trenar)
Årets kvinnelige parautøver: Vilde Nilsen
Årets lag: Anders Mol og Christian Sørum
Årets forbilde: Maren Lundby
Utøvernes pris: Karsten Warholm
Årets mannlige parautøver: Salum Ageze Kashafali
Årets ildsjel: Brit Eirin Tungeland
Årets mannlige utøver: Karsten Warholm
Årets navn: Karsten Warholm
Idrettsgallaens hederspris: Suzann Pettersen