Ambulanse rykte ut til full kvinne på utestad
Nekta å gå frå utestad.
Søndag i 21.20-tida blei politiet kontakta av vakt ved ein utestad i Os sentrum.
– Ei kvinne i 40-åra nekta å forlata utestaden, fortel politioverbetjent Anne Lyssand.
– Kvinna, som er i slutten av 40-åra, blei vurdert som ute av stand til å ta vare på seg sjølv, og ambulanse blei tilkalla.
Tre tilfelle av klage på feststøy
Laurdag i 22.30-tida fekk politiet klage på støy frå ein fest i eit bustadområde på Nore Neset.
– Patrulje på staden sendte heim nokre ungdomar som ikkje skal ha vore ønskt på staden. Så kom far heim og festen blei avslutta.
Klokka 23.55 kom det klage på støy frå ein båt i Os hamn.
– Båteigar, ein mann i 20-åra, fekk pålegg om å dempa musikken, noko han etterkom.
Klokka 01.35 kom det klage på støy frå ein fest i Hegglandsdalen. Politiet hadde ikkje ledige ressursar å senda.
To påkøyrde hjortar
Fredag starta hjortejakta, søndag morgon og søndag kveld kom det melding om påkøyrd hjort.
Søndag i 09.15-tida sprang ein hjort borti ein bil i Langedalen.
– Bilen blei bulka, hjorten sprang frå staden.
I 22-tida kom melding om påkøyrd hjort i Ulvenskiftet.
– Bilen fekk bulk i skjermen, hjorten sprang vidare. Ved begge tilfelle blei vilkontakt varsla.
Såg etter eritreiske grupper på Halhjem
I samband med den eritreiske feiringa som enda med protestar og gatekampar i Bergen i helga, var politiet i Os laurdag kveld på Halhjem for å sjekka om det kom bussar frå andre stadar på veg mot Bergen for å delta.
Dei fann ikkje noko å stoppa på Halhjem.
