Amalie skifta yrkesretning - no er ho finalist i Norges Hyggeligste

I dag blei finalistane i årets kåring av Norges Hyggeligste Håndverker presenterte.

Blant dei tre finalistane i kategorien «lærling» er Amalie Strønen Olsen frå Os.

– Amalie er veldig dyktig og strukturert. I tillegg er ho veldig blid og initiativrik, og har ved sidan av lærlingjobben tatt over styringa av instagramkontoen vår, seier dagleg leiar i Byggmester Aarvik AS, Bjarte Aarvik.

Ho er også Aarvik sin første kvinnelege lærling.

– Vi ser for oss at ho kunne vore ein god representant for yrket ut mot ungdomnsskuleelevar som skal velja retning, så vi kunne fått fleire kvinner inn i tømraryrket.

Skifta yrkesretning

Strønen Olsen har vore lærling i 2,5 år, og har eitt år igjen.

– Eg gjekk i utgangspunktet ein annan retning, innan reiseliv, der eg både var lærling og tok bachelorgrad, fortel Amalie.

– Men det var mykje sitjing og eg blei rastlaus, forklarer ho.

Då jobba ho på eit hotell i Haugesund, og fekk læreplass i eit tømrarfirma i nærleiken. Så flytta ho tilbake til heimbygda for å læra hos Aarvik.

– Eg forstår at jenter kan synast at det er litt skummelt å velja eit mannsdominert yrke, men det har gått veldig bra! Eg har blitt tatt godt imot, og eg trivst med å jobba med gutar.

– Oppgåvene er også kjekke og overraskande varierte. Nett no held eg på å demontera innreiing i ein bil vi skal selja. I Haugesund starta eg på nybygg og var mykje ute, her har eg vore ein del på rehabilitering innandørs.

Til finale i september

Amalie blei nominert av 17 ulike til prisen Norges Hyggeligste Håndverker.

– Første nominasjon kom frå pappa, fortel ho og ler.

Og pappa var ikkje påleine om å synast at Amalie er hyggeleg, 610 stemmer kom inn.

• OPPDATERT: No er det òg opna for stemming inn mot finale. Sjå alle kandidatane og gi stemme på hyggeligste.no

– Det var spennande å følgja med på, men også spennande å sjå kva juryen ville seia. Dei ser ikkje berre på stemmene, men korleis eg som handverkar promoterar yrket ut mot yngre.

No er Strønen Olsen blant 24 finalistar, ein av tre i kategorien lærling.

Finalen er i Gamle Logen i Oslo laurdag 23. september.

Finalistane per kategori

Open klasse:
Burim Avdyli, Drømmekjøkkenet Alnabru, Oslo
Kenth Antonsen, To Brødre Håndverkere for Samfunnet AS, Skien
Thomas Liestøl, Sola Parkettsliperi AS, Stavanger

Elektrikar:
Nouh Yougil, Proff Elektriker AS, Oslo
Lea Erlandsen, MIFO AS, Rauma
Anas Jarrari, Oneco Elektro AS, Oslo

Lærling:
Rebekka Kolvik, Stiftinga Viti, Ålesund
Mats Helland-Hansen, Kompetansebygg AS, Horten
Amalie Strønen Olsen, Byggmester Kjell Aarvik AS, Bjørnafjorden

Malar:
Tore Hermansen, NIME AS, Giske
Kenneth Vestli, Karlsen&Vestli AS, Vegårdshei
Marianne Fløysvik, Malerfirma Odd Fløysvik AS, Sandnes

Murar:
Frank Thonstad, Murmester Ivar S. Moe A/S, Trondheim
Tore Tveit, Backe Bergen AS, Bergen
Eivind Fonn, Fonn Bygg AS, Harstad

Rørleggar:
Ivar Anders Ulset, Tingvoll Rør AS, Tingvoll
Petter Warnes, Rørfunn AS, Trondheim
Abedin Dogani, Bjørn Gregersen AS, Horten

Snekkar:
Jens H. Nilssen, YESWOOD AS, Tønsberg
Tor Morten Odden, Lillegrinden AS, Trysil
Einar Arntzen, Effecct Bygg AS, Narvik

Tømrar:
Oleksii Sinistyn, Vi fikser AS, Oslo
Roger Haagensen, Byggmester og Takstmann Haagensen AS, Lillestrøm
Katarina Solend, N-Andersen Bygg AS, Moss