Alio: Nymerkt snarveg til Borgafjellet
Bildeserie: Vi har gått den myteomspunne traseen frå Knutabruo til topps.
Bildeserie:
Peder Fløysand og kameratane Bernt «Sogna-Bernt'n» Norevik og Harald Døsen fullførde i sommar bygginga av ein gapahuk på Borgafjellet. Gapahuken, som ligg på stien frå Borgafjellet og innover mot Møsnuken, er tufta på gamle grindverkstradisjonar.
Under Handverksdagane i Vognhallen hausten 2019 kunne du sjå byrjinga av bygget på nært hald.
- Les og sjå video: Hyllar faren sin og resten av Brukameratane
Truleg eit hjortetråkk
Med gapahuken på plass, og med det Fløysand seier er utelukkande positive tilbakemeldingar, har den nevenyttige trioen teke fatt på eit prosjekt dei laust snakka om i sommar - nemleg å få skilta og merka opp Alio.
Artikkelforfattaren har sjølv høyrd om Alio, den myteomspunne stien opp og ned Borgafjellet. At den skal starta ein eller annan plass ved Knutabruo er alle samde om, men meir enn det er det få som veit.
– Eg hugsar at vi i ungdomen òg nytta denne traseen for å koma oss opp og ned på fjellet, fortel Fløysand. Det er teikn som tyder på at det går eit hjortetråkk her, men det har vel aldri vore ein skikkeleg sti eller merkt løype.
På spørsmål om kvifor løypa har fått namnet Alio er Fløysand like sikker som han er usikker;
– Eg trur og meiner at det har med A-formen i skjeret opp fjellet, men skal eg vera heilt ærleg så er eg ikkje sikker. Kanskje nokon andre sit på eit anna svar? I så fall, tips@midtsiden.no
Ferdig merkt og nesten ferdig skilta
Fløysand fortel at no har han, Norevik og Døsen gått opp heile løypa og merkt ho med kvite merkelappar. I tillegg har dei kosta på treskilt i begge endar i stien.
– Eg har bestilt eitt skilt til som tydelegare skal visa stien når du går frå Borgafjellet mot Møsnuken, men no skal det i alle høve vera lett å finna inngangen til stien, både frå området ved Knutabruo og frå toppen av fjellet.
– Kanskje kan denne stien vera ei form for avlasting til dei vanlege løypene opp og ned frå fjellet. Det er ikkje tydeleg sti heile vegen, men om du har augene med deg skal du fint klara å følgja merkinga.
Ein nasestyvar av ein tur - men belønninga kjem
Midtsiden tok beina fatt onsdag morgon for å testa løypa.
Med bilen parkert i området ved Amfisenteret gjekk vi til Knutabruo via Prestegardsskogen og Hesteløypa.
Like ved bålpannene og steinbordet ved turstien som går mellom Nordmarka og Tøsdal, finn du det nye skiltet Fløysand og kompani har sete opp.
- Turen startar ganske brått opp gjennom skogen. Her er det ikkje mykje sti å spora, men held du deg til venstre i steinura, vil du lett kunne følgja merkinga. Det er ikkje å stikka under ein stol at turen opp ura er nådelaust bratt, og på ein regntung og blaut dag som i dag, var dette ein nasestyvar av ein start.
- Etter den bratte starten tek ura slutt, og terrenget vert lettare med skogbotn som underlag. Her får du verkeleg oppleva vakker lauvskog iblanda eit og anna majestetisk furu- og grantre. Her er tipset å kryssa over til høgre side for å følgja merkinga vidare opp.
- Brått kjem du ut av lauvskogen og ut på vidda du ser ligga mellom Borgafjellet og Linken. Her flatar terrenget ut, og det er det litt lengre mellom dei små furu-trea, men med vakne auge og litt forsiktig manøvrering i terrenget klarar du å finna neste merking. Sjølv om det av og til kunne vera litt vanskeleg å finna neste kvite merkelappen i den tåkeheimen Midtsiden opplevde i dag, er det aldri meir enn 50-100 meter mellom merkingane.
På ein dag med godt vêr kan du få ei rimeleg spektakulær utsikt som belønning om du hugsar på å snu deg rundt her.
Før du veit ordet av det får du masta på Borgafjellet til høgre, og like brått står du i krysset kor du kan velja mellom å gå rett fram og ned til Hjelle, til venstre inn mot Møsnuken eller til høgre og ut til varden på Borgafjellet.
Inkludert tid til å ta bilde, notera litt, og i styrtregn brukte Midtsiden sin utsendte reporter knappe timen opp til Borgafjellet frå Amfisenteret. Turen vart målt til ei stigning på 332 meter.
God tur!