- Aldri vore noko så stort på Os

Bli varsla om dei siste sakane:
Følg Midtsiden på Facebook

Os Sentrum kjem i slutten av månaden til å syde av liv, luktar og smakar då bønder frå mellomanna Frankrike, Spania, Tyskland, England og Italia kjem til bygda.

Dei er del av eit engelsk konsept, kalla European market og vitjar Os for første gong i historia.

- Vi kjem til å ta i bruk heile Osøyro for å ta i mot marknaden i tillegg til våre eigne marknadsdagar, fortel leiar i Os sentrum Renate Iversen.

- Dei treng aleine mellom 130-150 meter bodplass, så vi kjem til å ta i bruk både Landboden og Brugata i tillegg til torget.

- Så vidt eg veit har det aldri vore eit så stort marknad på Os som vi får i slutten av månaden, seier sentrumsleiaren.

Positiv oppleving

Kontakt med det europeiske markedet har Iversen fått gjennom organisasjonen Norsk Sentrumsutvikling som Os sentrum er ein del av.

- Eg har snakka med fleire sentrumsleiarar som har hatt vitjing av marknaden og dei rapporterer om berre positive opplevingar.

- Det er ein utruleg velorganisert og profesjonell gjeng som eg har kontakt med, så dette trur eg blir veldig bra, smilar Iversen.

Om det blir ein suksess håpar Iversen at marknaden kan halde fram også i åra som kjem.

Småskala produsenter

I seks år har marknaden reist rundt i Europa for å presentera småskalaprodusentar på tvers av landegrensene.

- Dei fleste av utstillerane er små familiebedriftar og gardar som tilverkar produkta sine med tradisjonelle metodar, fortel marknadssjef Olivier Simonin.

Kva kan osingane rekna med å møta på marknaden?

- Vi kjem med alt moleg frå tyske bratwurst og spansk paella til skinker, pølser, oliven, marmelade og ostar, fortel Simonin.

- Marknaden vil vera open frå 09-19 kvar dag, fortel marknadssjefen.

Dette kan du oppleva

Marknaden startar onsdag 29. juni og held fram til 3. juli. Os sentrum sine eigne marknadsdagar startar torsdagen. Frå dei europeiske utstillerane kan du mellomanna oppleve

• Fransk, nederlandsk, italiensk, engelsk ost
• Italienske delikatessar
  (Parma skinke, pasta, olivenolje, syltetøy, honning, sauser, Torrone, kjeks)
• Korsikansk, italiensk og spansk salami og skinke
• Britanny kjeks
• Spansk paella
• Engelsk sjokolade
• Tysk grill
• Tørka frukt og nøtter frå Midtausten
• Franske crêpes
• Gresk oliven og antipasti
• Fransk frukt og grønsaker
• Sveitsiske søtsaker
• Tysk charcuterie (hode, røkt skinke)
• marokkansk coucous
• nederlandske toffe-vaflar og minipancakes
• tartiflette fra franske Alpene