80 gjestedøgn på halvannan månad

Bildeserie:

Full skjerm

1 av 3

Det fine vêret vi har hatt den siste tida kan sjølvsagt vore med på den auka trafikken i gjestehamna.

– Eg var nett inne og såg på statistikken. Der har vi registrert 80 betalande hittil i mai og juni. I tillegg kjem 80 brukarar av industrikaien som betaler kai- og lasteavgift.

– Eg fekk diverre ikkje henta ut tala frå i fjor, men inntrykket er at det er ei lita auke. Det virker som vi ligg høgare i besøk no enn tidlegare, fortel hamnesjef Gitle Smaadal.

Slit med gjengangarar

Sjølv om han ikkje er i hamna til ei kvar tid, merker han seg at det er nokre som nyttar dei kommunale bryggene meir eller mindre som si eiga heimehamn.

– Vi har nokre som går att, og som ligg her over tid utan å betala for seg. Det merkelege er at nokre av dei også gjorde det i fjor.

– I dag har eg nett hatt ein runde for å finna eigarane til dei båtane det gjeld og tatt ein prat med dei. Det er greitt å ligga nokre dagar om ein har ein god grunn til det, men det er pussig kor mange som har motortrøbbel, seier han med eit underfundig smil.

– Samstundes skal det seiast at hadde vi ikkje hatt hamneavgifta ville nok problemet vore større.

Nyoppussa servicebygg

Gjestane har no tilbod om enno betre fasiliteter. I tillegg til straum for dei som betalar hamneavgifta på 150 kroner, får båtgjestar no tilgang til to dusjar/toalett og eitt vaskerom.

– I fjor hadde vi berre eitt av bada i orden. I år har vi fått båe opp og gå. Vi hadde ei frostskade i vinter som gjorde at vi var litt forseinka, men frå veka etter påske har dei vore tilgjengeleg.

– Nøkler får ein hos Peppes. Der betalar ein òg for bruk av anlegget, forklarar Smaadal.

– Blir det mykje brukt?

– Nei, dei fleste har nok fasiliteter i båten dei heller bruker. Dei som berre er innom her, eller som ikkje søv i båten er nok ikkje så mykje innom, men dei som kjem fredag og reiser søndag hender det brukar anlegget, avsluttar Smaadal.