7-fjellsturen i 75 år: Søndag er det jubileum
Mens vi lokalt kosar oss med Bjørnafjordtrimmen, går det mot jubileumsmarsj i fjella rundt Bergen.
Årets utgåve av Bjørnafjordtrimmen er over halvvegs ut i den ti månadar lange perioden.
Konkurransen har så langt 446 deltakarar til 162 turmål.
Nils Atle Askvik, som vann i fjor med beint 40.000 poeng, er i skrivande stund oppe i 21.305 poeng etter 1.745 innsjekk på 54 ulike turmål. På dei neste plassane kjem Geir Haugland med 7.591 og Mikkel med 6.280 poeng.
Komande helg er det fjella rundt Bergen som er i fokus.
Søndag blir 7-fjellsturen arrangert - 75 år sidan starten i 1948.
Ruta er: Lyderhorn, Damsgårdsfjellet, Løvstakken, Ulriken, Fløyen, Rundemanen og Sandviksfjellet.
Ruta har vore lik sidan 1981. Grunna manglande kapasitet på Askøy-ferja blei Askefjellet den gong skifta ut med Rundemanen.
7-fjellsturen er 35 kilometer lang og 2500 høgdemeter.
I 1948 hadde 7-fjellsturen 206 deltakarar. 170 av dei kom i mål, skriv Bergen og Hordaland Turlag i ei sak med historiske tilbakeblikk.
7-fjellsturen er Den Norske Turistforenings sitt største enkeltståande arrangement. Maks deltagertal som kan gå samtidig er 9.000.
3- (10 km) og 4-fjellsturen (20 km) blei etablert i 2017. 3- og 4- fjellsturen er dei siste 3 eller 4 toppane.
